Қирғизистон парламенти муддатидан олдин ўзини тарқатишга қарор қилди

Бугун Қирғизистон Жогорку Кенеши (парламенти) 7-чақириқ депутатларини ўзини тарқатиш ҳақида қарор қабул қилди. Бу таклиф 32 нафар депутатдан иборат ташаббус гуруҳи томонидан киритилган.

Қарорнинг икки асосий сабаби қайд этилди: янгиланган Сайлов тўғрисидаги қонун (парламент сайловларининг янги тизимига кўра) ва Жогорку Кенеш ҳамда Президент сайловлари орасидаги қисқа муддат.

Жогорку Кенешнинг 7-чақириқ конституциявий ваколат муддати 2026 йил ноябрда тугайди. Президент сайловлари эса 2027 йил январга белгиланган.

Ташаббускор депутатларнинг фикрича, икки йирик сиёсий тадбирни бир вақтда ўтказиш мамлакатда ижтимоий-сиёсий барқарорликка салбий таъсир кўрсатиши мумкин.

Парламент тарқатилгандан сўнг, Президент депутатларнинг муддатидан олдинги сайловини тайинлаш тўғрисида фармон имзолаши лозим.