Самарқандда Ғафуржон Маҳмудов хотирасига бағишланган халқаро конференция бўлиб ўтди
Самарқанд давлат университетида адабиётшунос олим Ғафуржон Маҳмудов хотирасига бағишланган “Муаллим ва муҳаррирга эҳтиром” халқаро илмий-амалий конференция бўлиб ўтди.
Тадбирда Самарқанд илмий-адабий муҳити жамоатчилиги, СамДУ профессор-ўқитувчилари ҳамда Ғафуржон Маҳмудовнинг оила аъзолари иштирок этди.
Анжуманни Самарқанд давлат университети ректори, Ўзбекистон Республикаси фан арбоби Рустам Холмуродов кириш сўз билан очди. Шундан сўнг, Тожикистоннинг мамлакатимиздаги Фавқулодда ва мухтор элчиси Абдужаббор Раҳмонзода видеоконференция орқали конференция ишига муваффақият тилади.
- Бугунги кунда узоқ ва яқин ўтмишда алоҳида мавқега эга бўлган таниқли ижодкорлар, илм-фан намояндаларининг ҳаёти, ижоди, илмий-адабий мероси мазмун моҳиятини чуқур ўрганиш, улар ҳақидаги ибратли маълумотларни кенг жамоатчиликка етказиш, ёш авлод вакиллари орасида тарғиб ва ташвиқ этиш, шу орқали ёшларни эзгулик руҳида тарбиялаш бўйича кўплаб ишлар қилинмоқда, - деди Р.Холмуродов, - Президентимиз таъкидлаганидек, буюк аллома ва адибларимиз, азиз авлиёларимизнинг бебаҳо меросини ўрганиш, енгилмас саркарда ва арбобларимиз жасорати билан боғлиқ воқеаларни ёшлар онгига сингдириш уларда миллий ғурур ва ифтихор туйғусини кучайтириши айни ҳақиқат.
Ғафуржон Маҳмудов Самарқанд давлат университетидан етишиб чиққан адабиётшунос олим, публицист ва муҳаррир. У жадид адабиётида ўзбек ва тожик маданий алоқалари, икки халқ адабиётида маърифатпарварлик ғоялари мавзуларида илмий тадқиқот олиб борган, маънавият ва маърифатнинг фаол тарғиботчиси бўлган. Самарқанд филологлар мактаби ривожига, халқлар дўстлиги ва адабий ришталар такомилига улкан ҳисса қўшган ушбу етук адабиётшунос олим илмий меросини кенг ўрганиш, асарларида илгари сурилган илмий қарашлар мазмун-моҳиятини тарғиб этиш олдимизда турган муҳим вазифа.
Конференция давомида СамДУ профессор-ўқитувчилари Ғафуржон Маҳмудовнинг илмий-педагогик ва журналистик фаолиятига батафсил тўхталдилар.
Мазкур конференция адабиётшунос олим Ғафуржон Маҳмудов хотирасини абадийлаштириш, олим илмий меросини ёш авлодга етказиш ва устоз ёдига эҳтиром кўрсатишда муҳим аҳамият касб этади.
СамДУ ахборот хизмати,
Шавкат Акрамов (сурат).
