Соғлиқни сақлаш вазирлиги: яна шифокорга сабабсиз таҳдид қилинди
Ижтимоий тармоқларда тарқалган “Spark” автомашинаси ҳайдовчиси “Cobalt” автомашинасини турган жойида орқасидан келиб, зарб билан қайта-қайта уриб, сўнгра ҳайдовчи машинадан тушиб “Энди буларга кўрсатаман” дея кимгадир таҳдид қилаётган ҳолати акс этган видеолавҳа муҳокамаларга сабаб бўлди. Маълум бўлишича, ушбу воқеа Жондор туман тиббиёт бирлашмаси ҳудудида содир бўлган. Соғлиқни сақлаш вазирлиги маҳкур ҳолатни ўрганиб, қуйидагиларни маълум қилади.
2019 йил 11 август куни соат тахминан 18:00 атрофида В.Қ. исмли фуқаро Жондор туман тиббиёт бирлашмаси туғруқ бўлимига маст ҳолда келиб, “Д.Қ исмли аёл 3 кундан бери туға олмаяпти, сенлар қарамаяпсанлар”, деб жанжал кўтаради ва шифокорларни ҳақорат қилади. Иш вақтини якунлаб, уйига қайтаётган акушер-гинеколог М.Т. нима бўлаётганини билиш учун воқеа жойига боради. В.Қ.нинг мақсадини тушунгач, у айтган аёлдан хабар олиш учун туғруқхонага қайтиб кириб, беморлар қайд этилган дафтардан Д.Қ.нинг исми-фамилиясини излайди. Бироқ рўйхатда бундай бемор қайд этилмаган эди. Сўнгра, кўчага чиқиб В.Қ.га қариндоши шифохонада эмаслигини айтади.
Шу пайтда В.Қ. шифокорни ҳақорат қилиб, мушти билан уриб, жароҳат етказади. Теварак-атрофдаги одамлар уларни ажратиб қўйгач, шифокор иш вақти тугагани учун уйига қайтиш мақсадида кўчада турган машинаси томон отланади. Бу пайтда В.Қ. ҳам “Spark” русумли автомашинасига ўтириб, туғруқ бўлими биноси ёнида турган шифокор М.Т.га тегишли “Cobalt” русумли машинасининг орқасига “Spark”и билан бориб, бир неча маротоба уради.
Ушбу ҳолат бўйича ўша пайтнинг ўзида туман ички ишлар бўлимига хабар қилинган. Бироқ энг ачинарлиси шуки, ўша куни фуқаро В.Қ.нинг қариндоши шифохонада эмас, уйида бўлган. У аёл орадан икки кун ўтиб, 13 август куни эрталаб, соат 08:15 да туғруқ мажмуасига келтирилган ва шифокорларнинг кўмагида шу куни кўзи ёриган. Ҳозир она ва боланинг саломатлиги яхши. Яқин кунларда уларга уйга рухсат берилади.
Кейинги пайтларда шифохоналарда тиббиёт ходимларига беморларнинг қариндошлари ва яқинлари томонидан ноҳақ таҳдид қилиниши, ҳатто, тан жароҳати етказилиши ҳолатлари тез-тез кузатилаётгани жуда аянчли ҳолатдир. Бу галгиси янада ошиб тушди: энди шифокорнинг мол-мулкига ҳам зиён етказилди. Ачинарлиси, бу ҳодисани содир этган инсон Жондор туман ФҲДЁ бўлими ходими экан.
Соғлиқни сақлаш вазирлиги яна бир карра халқимизга, жамоатчиликка мурожаат қилиб шуни маълум қиладики, тиббиёт ходими учун энг эзгу мақсад – дардига малҳам истаб келган ҳар бир беморга шифо бахш этиш. У бундай эзгу вазифани кимнингдир таҳдиди ёки дўқ-пўписасидан қўрққани учун эмас, аввало, ўзининг хизмат бурчи, инсоний вазифаси бўлгани учун виждонан бажаради.
Шу боис Соғлиқни сақлаш вазирлиги ҳуқуқ-тартибот идораларидан бундай ҳолатларга қарши кескин курашиш, тиббиёт ходимларининг ҳақ-ҳуқуқлари ҳимоясини кучайтиришни такроран сўраб қолади.
