Усмонхон Алимов Самарқанд вилояти имом-хатиблари билан учрашди
Ўзбекистон Мусулмонлари идораси раиси, муфтий Усмонхон Алимов ва Дин ишлари бўйича қўмита раиси Абдуғофур Аҳмедовнинг Самарқанд вилояти бўйлаб сафари давом этмоқда.
Самарқанд шаҳридаги Ёшлар марказида вилоятда фаолият олиб бораётган барча имом-хатиб, имом ноиблари иштирокида йиғилиш бўлиб ўтди.
Унда диний соҳа вакиллари томонидан олиб борилаётган ишлар таҳлил қилиниб, йўл қўйилган камчилик ва мавжуд муаммолар муҳокама қилинди ҳамда уларнинг ечими бўйича аниқ таклифлар берилди. Шунингдек, бугунги кунда имом-хатиблар олдида турган муҳим вазифалар ва жаҳолатга қарши маърифат билан курашда уларнинг тутган ўрни каби масалаларга алоҳида эътибор қаратилди. Ҳозирги ислоҳотларнинг янги босқичида диний-маърифий йўналишдаги ишларни жадаллаштириш, жаҳолатга қарши маърифат билан курашиш, олиб борилаётган ислоҳотларнинг мазмун-моҳияти, бугунги тинч ва осойишта кунларнинг қадрига етиш ва шукроналик ҳисси билан яшаш, соф ислом таълимотини кенг тарғиб қилиш ишларида фаолликни ошириш бўйича тўхталиб ўтилди.
Йиғилиш якунида “Вақф” хайрия жамғармаси томонидан барча имом-хатибларга Қуръони карим китоби тарқатилди.
Ўзбекистон Мусулмонлари идораси Самарқанд вилояти вакиллиги ахборот хизмати.
