"Яшил шаҳар" қачон, қандай барпо этилади?
Самарқанд шаҳрида Европа тикланиш ва тараққиёт банки (ЕТТБ) билан ҳамкорликда “Яшил шаҳар” мастер-режасини ишлаб чиқиш мақсадида ўқув машғулоти ўтказилмоқда.
Машғулотда вилоятлар ва Тошкент шаҳарлари ҳокимларининг ўринбосарлари, шунингдек, Қорақалпоғистон Республикаси Экология ва атроф-муҳитни муҳофаза қилиш давлат қўмитаси, вилоятлар ва Тошкент шаҳар экология ва атроф-муҳитни муҳофаза қилиш бошқармалари бошлиқлари қатнашяпти.
- Мазкур тренингнинг асосий мақсади ҳокимликларга “Яшил шаҳар” ҳаракат режасини ишлаб чиқишга кўмаклашишдир, - деди
Экология, атроф-муҳитни муҳофаза қилиш ва иқлим ўзгариши вазирининг биринчи ўринбосари О.Қудратов. - Тренинг давомида “Шаҳарнинг экологик вазиятини баҳолаш ва зарур ечимларни ишлаб чиқишда мавжуд муаммолар ва имкониятларни аниқлаш бўйича ёндашув”, “Шаҳарларнинг, атроф-муҳитнинг асосий ҳолати тўғрисидаги билимларни маълумотлар базасидан фойдаланиш орқали маълумотлар ва солиштирувчи таҳлил натижаларини тўплаш орқали кенгайтириш”, “Ривожланаётган миллий сиёсат ва қонунчилик контекстини кўриб чиқиш маҳаллий ҳокимият органлари даражасида экологик яхшиланишларни қўллаб-қувватлашга хизмат қилиши мумкин” каби масалаларга эътибор қаратиляпти.
Шунингдек, “Эришиладиган ва тегишли ҳаракатларни ишлаб чиқишда индикаторлар тўплами ва бошқа маълумотлар билан қандай ишлаш керак?”, “Экологик ечимлар, яшаш муҳитини тиклаш, интеллектуал технологиялардан фойдаланиш ва бошқа каби экологик ҳаракатларнинг янги усулларини ўқитиш”, “Тегишли ресурсларни тўғри тақсимлаш, маҳаллий ҳокимиятнинг турли бўлинмалари ўртасида ҳамкорлик қилиш ва барча жараён давомида ташқи манфаатдор томонлар билан ҳамкорлик қилиш, ҳаракатлар учун кенг асос яратиш ва самарали амалга ошириш имкониятини ошириш” каби мавзулар борасида ҳам фикр алмашилмоқда.
Тренинг давомида ҳокимликнинг иқтисодий ва ижтимоий капиталини яратиш билан бирга атроф-муҳит ҳолатини яхшилашга бевосита кўмаклашиш учун турли манбалардан инвестициялар имкониятлари тўғрисида тушунчалар олиш, “Яшил шаҳар” режасининг амал қилиш даврида муҳим ўзгаришларга эришишга қаратилган ҳаракатларни самарали мониторинг қилиш ва амалга ошириш учун билим олиш кўзда тутилган.
