Зеленский ва Уиткофф Ослода учрашди, энди навбат Путин билан музокараларга
Украина президенти Владимир Зеленский ва АҚШ махсус вакили Стив Уиткоффнинг Ослода бўлиб ўтган учрашуви конструктив руҳда якунланди.
Томонлар тинчлик режаси, Украина учун хавфсизлик кафолатлари ва урушдан кейинги тикланиш масалаларини муҳокама қилди. Учрашувда Норвегия бош вазири Йонас Гар Стёре ва Финландия президенти Александр Стубб ҳам иштирок этди.
Ослодаги учрашувда Зеленский Украина иштирокисиз мамлакат тақдирига оид қарорлар қабул қилиниши мумкин эмаслигини яна бир бор таъкидлади. Унинг айтишича, Украина урушда мағлуб бўлаётгани йўқ, аммо «одамлар ва вақтни» йўқотмоқда. Шунингдек, тинчлик ташаббуслари ва хавфсизлик кафолатлари билан бир қаторда Украина билан разведка маълумотларини алмашишни тиклаш масаласи ҳам кўтарилди.
Бугун Уиткофф Санкт-Петербургга етиб келиб, Россия президенти Владимир Путин билан Константин саройида учрашди. Асосий мавзу Украинадаги урушни тугатиш йўллари бўлди. АҚШ давлат котиби Марко Рубио Ослодаги музокараларни ижобий баҳолаб, уларда билдирилган таклифлар Россия томонига етказилишини таъкидлади. Норвегия бош вазири эса бу мулоқотлар давлат раҳбарлари даражасидаги учрашувга йўл очиши мумкинлигини билдирди.
АҚШ президенти Дональд Трамп Киевни урушни тугатиш бўйича келишувга чақириб келмоқда. У Украина Донецк вилоятининг қолган қисмини жангсиз топшириши ҳақида ҳам гапирган. Бироқ Киев ва Европа ҳамкорлари бундай ёндашув Россия урушни тўлиқ тўхтатишига кафолат бермаслигидан хавотирда.
Путин билан учрашувда яна бир муҳим воқеа юз берди: Россия 2022 йилдан бери қамоқда сақланган америкалик собиқ ўқитувчи Стивен Хаббардни озод қилди. Уиткофф бу қарор учун Россия раҳбарига миннатдорлик билдирди.
Энди асосий эътибор Москва Ослода муҳокама қилинган таклифларга қандай муносабат билдиришига ва кейинги дипломатик қадамларга қаратилмоқда. Музокара давом этмоқда. Ҳозирча Украинадаги урушни тугатиш бўйича якуний келишувга эришилгани ҳақида расмий маълумот йўқ.
