Зеленский Путинга очиқ хат йўллади, Давлат думаси муносабат билдирди

Украина президенти Владимир Зеленский Россия президенти Владимир Путинга очиқ мактуб йўллаб, урушни тугатиш учун шахсий учрашув ўтказишни таклиф қилди.

Зеленский учрашувни Москва ёки Киевда эмас, балки нейтрал жойда — масалан, Швейцария, Туркия ёки араб давлатида ўтказишни таклиф қилди.

Мактубида у урушни Путиннинг шахсий қарори деб атаб, Россия катта йўқотишларга учраётгани, санкциялар босими ортиб бораётгани ва жамиятда урушдан чарчоқ кучаяётганини таъкидлади. Шунингдек, у Украина мустақиллигини сақлаб қолгани ва курашни давом эттиришга тайёрлигини билдирди.

Украина раҳбари Россия армиясининг йўқотишлари ортиб бораётганини, Москва эса ҳануз ўзининг ҳарбий мақсадларига эриша олмаганини қайд этди. Унинг таъкидлашича, Россия 2027–2028 йилларда ҳам урушни давом эттириш режаларини кўриб чиқмоқда.

Зеленский музокаралар даврида тўлиқ ўт очишни тўхтатиш, ҳарбий асирларни «барчасини — барчасига» тамойили асосида алмашиш ҳамда уруш туфайли олиб кетилган тинч аҳоли ва болаларни қайтаришни таклиф қилди.

Унинг фикрича, музокараларда АҚШ ва Европа давлатлари ҳам иштирок этиши мумкин. Мактуб сўнгида Зеленский Путинни урушни тўхтатишга чақириб, агар Москва бунга рози бўлмаса, Украина халқаро ҳамкорлари ёрдамида курашни давом эттиришини билдиради.

Айрим давлатлар раҳбарлари Зеленскийнинг хатини "яхши ташаббус" деб аташди ва тўғридан-тўғри мулоқотни қайта бошлаш ғоясини қўллаб-қувватламоқда.

Россия Давлат думасида Украина раҳбарининг Путинга йўллаган очиқ мактубига муносабат билдириб, бу қадамни «умидсизликдан қилинган ҳаракат» деб атади. Айтилишича, Зеленский Россия президентига йўллаган очиқ мактуби орқали тинчликни тилаб олмоқчи.

Аввалроқ Путин Санкт-Петербург халқаро иқтисодий форуми доирасида Украина билан тинчлик келишувини имзолаш эҳтимолига изоҳ берган эди. У бундай ҳужжат имзоланишини тарихий воқеа деб атади, бироқ Россия келишувга Киевнинг легитим вакили билан эришишни истамоқда.

Путинга очиқ мактубни Зеленский шундан кейин эълон қилди.