Одамлар билан мулоқот маданияти уларга яратилган қулайлик, эътибор ва масъулиятдан бошланади
Оқдарё тумани прокуратурасига иш билан бориб, фуқароларни қабул қилиш хонасидаги шароитларни кўргач, шу хулосага келдик.
Сир эмас, фуқаролар мурожаатлари билан ишлашда нафақат қонунчилик талабларига риоя қилиш, балки инсон учун қулай муҳит яратиш муҳим аҳамиятга эга. Мазкур қабулхонада ана шу жиҳатларга алоҳида эътибор қаратилганини кўриб, хурсанд бўласан киши.
Қулай кутиш жойлари, ичимлик суви, телевизор, ҳуқуқий ва маънавий-маърифий адабиётлар, бадиий китоблар жамланган бурчак, шунингдек, газета-журналлар фуқароларнинг мурожаат жараёнида ўзини эркин ва хотиржам ҳис қилишига хизмат қилади. Озода ва тартибли муҳит эса қабул жараёнининг маданияти ва ташкил этилишида муҳим омиллардан бири бўлган, десак хато қилмаган бўламиз.
Бугунги кунда давлат органларига бўлган ишонч кўп жиҳатдан одамларнинг кундалик тажрибаси орқали шаклланади. Шу маънода, мурожаатчилар учун яратилган шароитлар фақат қулайлик эмас, балки инсон қадрига бўлган муносабатнинг амалий кўринишидир.
Бундай шароитларнинг яратилиши фуқароларнинг мурожаатларини ўз вақтида ва сифатли кўриб чиқиш, уларнинг муаммоларини қонуний ҳал этиш ҳамда инсон манфаатларини таъминлашга қаратилган давлат сиёсатининг амалий ифодасидир. Шунга амин бўлдикки, мазкур қабулхона фуқаролар билан самарали мулоқотни йўлга қўйиш, уларга ҳурмат ва эътибор кўрсатиш ҳамда аҳолининг давлат органлари фаолиятидан розилигини оширишда муҳим аҳамият касб этади.
Фикримизча, фуқаролар билан ишлашда бундай ёндашувни бошқа ташкилотларда ҳам кенг жорий этиш мақсадга мувофиқ. Зеро, ҳар бир мурожаат ортида инсон тақдири, унинг муаммоси ва умиди бор.
