Шошилинч тайёргарлик: Трамп, Путин ва Зеленский учрашуви яқин

CNN телеканал маълумотларига кўра, Дональд Трамп ўз жамоасига зудлик билан Россия ва Украина президентлари билан музокаралар ташкил қилишни бошлашни топширди.

Тайёргарлик аллақачон бошланган. Учрашувлар кейинги икки ҳафта ичида ўтказилиши мумкин.
Путин ва Трамп яқин кунларда учрашишини Россия етакчисининг ёрдамчиси Юрий Ушаков ҳам тасдиқлади.
Трамп яқин кунларда Путин билан учрашиши, сўнгра Зеленский билан уч томонлама учрашув ўтказиш нияти ҳақида бир қанча Европа етакчиларини хабардор қилган. Унинг ёрдамчилари бу музокараларни режалаштиришда вақтни бой бермаяпти, гарчи бундай тадбирларни ташкил қилиш учун бир ҳафтадан кўпроқ вақт кетади.

CNN таъкидлайди: Трамп ўз жамоасига босим ўтказмоқда ва улардан тезкорлик талаб қилмоқда. Кўриниб турибдики, у бутун дунёга фақат ўзигина “урушни тўхтатиш”га қодир эканлигини кўрсатмоқчи.
Украина президентининг таъкидлашича, ҳозирда музокараларнинг учта формати ишлаб чиқилмоқда: иккита икки томонлама ва битта уч томонлама. Унинг сўзларига кўра, Украина тўғридан-тўғри мулоқотдан қўрқмайди ва Россиядан ҳам худди шундай қатъийликни кутади.