Кейин кеч бўлмасин: АҚШ Сенати Трампнинг ваколатларини чеклашга киришди

АҚШ Сенати президентнинг ҳарбий қарорлари устидан Конгресс назоратини кучайтирувчи қонун лойиҳасини маъқуллади.

Ҳужжатга кўра, Оқ уй ҳар қандай ҳарбий ҳаракатни Конгресс билан келишиши шарт бўлади. Қонун лойиҳасини 50 нафар сенатор қўллаб-қувватлади, 47 нафари эса қарши овоз берди.

Ташаббусни асосан демократлар ва республикачиларнинг бир қисми қўллаб-қувватлади. Республикачиларнинг кўпчилиги эса унга қарши чиқди.

Бундай қонунни қабул қилишга уринишлар 2025 йилдан бери етти марта амалга оширилган, аммо аввалги сафарлар муваффақиятсиз якунланган эди.

Ўшанда Сенат июнда АҚШнинг Эрон ядровий объектларига берган зарбаларидан сўнг ҳарбий ваколатлар ҳақидаги қонун лойиҳасини илк бор кўриб чиқди. Иккинчи овоз бериш эса жорий йилнинг 5 март куни — АҚШ ва Исроилнинг Эронга қарши уруши бошланганидан кўп ўтмай ўтказилди.

АҚШнинг 1973 йилги ҳарбий ваколатлар тўғрисидаги қонунига кўра, президент 60 кун давомида ҳарбий ҳаракатлар олиб бориши мумкин. Шундан кейин у ё ҳаракатларни тўхтатиши ёки Конгресс рухсатини олиши, ёхуд яна 30 кунлик муддат узайтирилишига эришиши керак.

60 кунлик муддат 1 майда якунланди. Худди шу куни Трамп Эрон билан вақтинчалик сулҳ “ҳарбий ҳаракатларга нуқта қўйгани”ни маълум қилди.

Яқинда Трамп Форс кўрфази давлатлари етакчилари илтимосига кўра Эронга режалаштирилган зарбани кечиктирганини айтганди. Шу билан бирга, у ҳарбийларга кенг кўламли ҳужумга тайёр туриш бўйича топшириқ берган.

Гулнора Холдорова тайёрлади.