"Dinamo" nazorat bahsida "Bunyodkor"ni yengdi

Yangi mavsumda o‘z oldiga Superligaga chiqishni maqsad qilgan “Dinamo” jamoasi Toshkentda boshlagan 4-yig‘ini doirasida “Bunyodkor” jamoasiga qarshi nazorat bahsida maydonga tushdi.

“Bunyodkor” futbol akademiyasi o‘yingohida kechgan uchrashuvda “Dinamo” bosh murabbiyi D.Fayziyev bir qator futbolchilarni sinovdan o‘tkazdi. Uchrashuvni hujumkor boshlagan mezbonlar 8-daqiqada V.Nuriyevning goli evaziga hisobni ochdi - 1:0.

Bu goldan keyin hujumkorlikni oshirgan samarqandliklar 15-daqiqaga kelib hisobni tenglashtirishdi. “Buxoro”dan “Dinamo”ga kelib qo‘shilgan N.Umurov o‘z goli bilan muvozanatni tikladi - 1:1.

Ikkinchi bo‘limda zaxiradan maydonga tushirilgan futbolchilar “Dinamo”ning g‘alabasini ta’minlashdi. 72-daqiqada tajribali yarimhimoyachi D.Karimovning yo‘llagan zarbasi hisobni 1:2 ko‘rinishga olib keldi.

“Dinamo” navbatdagi o‘rtoqlik uchrashuvini ertaga  - 10 fevralda Qozog‘istonning “Qiron” jamoasiga, 12 fevralda esa “Buxoro”ga qarshi o‘tkazadi.

Dilmurod TO‘XTAYEV.