Тойлоқдаги ўзгаришлар журналистлар нигоҳида

Матбуот ва оммавий ахборот воситалари ходимлари куни олдидан журналистлар уюшмаси вилоят бўлими Тойлоқ туман ҳокимлиги билан ҳамкорликда мазкур туманга пресс-тур ташкил этди.

Тумандаги 50 та маҳаллада 37,9 минг хонадон, 53,1 минг оила ва ушбу оилаларда  231,1 минг нафар аҳоли истиқомат қилади. Меҳнатга лаёқатли ёшдаги аҳоли сони 122,8 минг киши ва иқтисодий фаол аҳоли 89,1 минг нафарни ташкил этади.

Яхши натижани таълим белгилайди

Дастлабки манзилимиз туманда ҳозирча ягона бўлган “Беҳбудий ворислари” хусусий таълим маскани бўлди. 2025 йил очилган, 250 нафар ўқувчига мўлжалланган мактабда жорий йилдан 400 нафаргача ёшлар таълим олиб, олий таълим муассасасига кузатилади. Мактабда меҳнат қилаётган 50 дан ортиқ ўқитувчи ва ходимларнинг маҳорати туфайли 76 нафар мактаб битирувчиси олий таълимга кириш учун турли фанлардан сертификатларни қўлга киритди. Туркияда ўтказилган халқаро олимпиадада 16 нафар ўқувчи юқори ўринларни эгаллаган.

Аждодлар хотирасига эҳтиром

Тойлоқ Маҳмудхўжа Беҳбудий таваллуд топган замин ва бу ерда адибга алоҳида эҳтиром кўрсатилади. Ўтган йил тадбиркор А.Ходиев адиб туғилган Бахшитепа маҳалласида “Беҳбудий кутубхонаси” ташкил этган, 15 ва 17-умумтаълим мактабларида ҳар ой 30 нафар ўқувчига “Беҳбудий стипендияси” берилади. Маҳалла марказида “Маҳмудхўжа Беҳбудий боғи”, “Маҳмудхўжа Беҳбудий кутубхонаси ва уй-музейи”, “Маҳмудхўжа Беҳбудий илм нури маскани” номли ўқув маркази ташкил этилиб, Маҳмудхўжа Беҳбудийнинг бюсти ўрнатилган.

Кейинги манзилимиз туманда ташкил этилган “Амир Темур боғи” бўлди.

-  Буюк саркарда ва давлат арбоби Амир Темур таваллудининг 690 йиллиги муносабати билан туманимизнинг Ўртақишлоқ маҳалласида Амир Темур боғи барпо этилди, - дейди “Қўшчинор” газетаси муҳаррири Мўтабар Йўлдошева. – Тарихга назар ташласангиз Амир Темур кўплаб боғлар барпо этган, жумладан, биздаги Боғизоғон боғи ҳам ана шу боғлардан бири ҳисобланади. Шу боис, саркарда номи билан аталадиган боғ ҳудуди тўлиқ ободонлаштирилиб, Амир Темур ҳайкали қайта таъмирланди. Натижада ҳудуд замонавий ва эстетик жиҳатдан янада жозибадор масканга айланди. Бундан ташқари, музей ташкил этилиб, сайёҳлар учун қулай шарт-шароит яратилмоқда. Мазкур боғ ёшларни миллий қадриятлар ва тарихий меросга ҳурмат руҳида тарбиялашга хизмат қилувчи муҳим маънавий масканлардан бири бўлиб қолмоқда. Ҳозирда Ўртақишлоқ маҳалласига Амир Темур номини бериш бўйича таклиф тайёрланмоқда.

Туманда жорий йилнинг дастлабки тўрт ойида саноат маҳсулотлари ишлаб чиқариш ҳажми 1,2  триллион сўмни, қишлоқ хўжалиги маҳсулотлари ҳажми 870,6 миллиард сўмни, хизматлар ҳажми 568 миллиард сўмни, чакана савдо айланмаси ҳажми 388,9 миллиард сўмни, қурилиш-пудрат ишлари ҳажми 446,1 миллиард сўмни, маҳсулотлар экспорти ҳажми 6,8 миллион долларни ташкил этди.

Маҳсулотимиз сифати – бизнинг кафолатимиз

Тумандаги Pet Agro Oil компанияси ўсимлик мойлари ишлаб чиқариш ва қайта ишлаш йўналишида самарали фаолият юритмоқда. Ишлаб чиқаришда илғор технологик ечимлардан фойдаланиш маҳсулотларнинг сифатини таъминлаш, энергия тежамкорлигини ошириш ва ишлаб чиқариш самарадорлигини юксалтиришга хизмат қилмоқда. Корхонада хомашёни қабул қилишдан тайёр маҳсулотни истеъмолчига етказиб беришгача бўлган жараёнлар замонавий стандартлар асосида амалга оширилади. Бугунги кунда корхона ички бозор эҳтиёжларини қондириш билан бир қаторда, ишлаб чиқариш ҳажмини кенгайтириш, янги технологияларни жорий этиш ҳамда маҳсулот турларини кўпайтириш устида иш олиб бормоқда.

Аҳоли даромадларини ошириш, барқарор иш ўринларини яратиш ҳамда камбағалликни қисқартириш мақсадида барча имкониятларни сафарбар этган ҳолда, 2026 йилнинг январ-апрел ойларида 9392 нафар аҳолининг даромадлари оширилишига эришилди. 1179 нафар  аҳоли доимий ишга эга бўлди. Шундан, инвестиция йўналишида 163 та, хизматлар йўналишида 190 та, қишлоқ хўжалигида 116 та, бошқа йўналишларда 710 та янги иш ўрни яратилди. 996 та яширин иш ўрни соядан чиқарилди.

Пресс-тур давомида тумандаги саноат зонаси фаолияти билан ҳам танишдик. Бу ерда “Сам-делфин” корхонаси томонидан 500 бош қорамол боқилмоқда ва йилига 75 минг бош парранда боқиш лойиҳаси ишга туширилмоқда. “Файз” МЧЖ томонидан қурилиш материаллари, жумладан, турли ўлчамдаги бетон плиталар ишлаб чиқарилмоқда.

Тумандаги Қўшчинор маҳалласи асосан деҳқончилик ва чорвачиликка ихтисослашган. Томорқаларда маккажўхори етиштириш маҳалланинг асосий драйвери ҳисобланади. Масалан, 10 сотих томорқаси бор хонадон икки мавсумда ушбу экиндан 16 миллион сўмдан ортиқ даромад олади. Маҳаллада жойлашган “Акмал Тошпўлатович” кўп тармоқли фермер хўжалигида 2 мингдан ортиқ наслли чорва моллари боқилади. Хўжаликда кунига 4,5-5 тоннагача сут олиниб, шу ернинг ўзида қайта ишланиб, истеъмолчиларга етказиб берилади. 80 нафардан ортиқ ишчи меҳнат қилаётган хўжаликда йилига 200 тонна гўшт, жорий йилдан Корея технологияси асосида интенсив усулда балиқ боқиш бошланди. Хўжалик аъзоларининг хайрли ташаббуси билан ўтган йили маҳалладаги кам таъминланган оилаларга 15 бош соғин сигир берилибди. Бу йил ҳам бу анъанани давом эттириш режалаштирилган.

Туман ҳокими Беҳзод Раҳматуллаев журналист ва соҳа ходимлари билан учрашувда ҳудудда олиб борилаётган ишлар хусусида маълумот берди.

-  Тумандаги 50 та маҳалла деҳқончилик, чорвачилик ҳамда хизмат кўрсатишга ихтисослашган, шундан 17 та маҳалла чуқур, 25 та маҳалла ўрта ва 8 та маҳалла паст ихтисослашган, - дейди Б.Раҳматуллаев. - Жорий йил якунига қадар 10 та маҳалла чуқур ихтисослашувга ўтказилади. Йил якуни билан туманни ишсизликдан холи ҳудудга айлантириш бўйича комплекс чора-тадбирлар белгилаб олганмиз. Жумладан, 25,4 минг аҳоли даромади оширилади, 4,5 мингдан ортиқ аҳоли доимий иш ўрнига эга бўлади, 2,6 мингта яширин иш ўрни соядан чиқарилиб, ишсизлик даражаси 3,2 фоизга пасайтирилади. 

Тойлоқ туманида амалга оширилаётган бунёдкорлик ва маънавий-маърифий лойиҳалар ҳудуднинг ижтимоий инфратузилмасини янада ривожлантириш, ёшлар учун кенг имкониятлар яратиш ҳамда тарихий ва миллий қадриятларни асраб-авайлашга хизмат қилмоқда. Келгусида таълим, маданият ва маънавият йўналишларида янги лойиҳаларни амалга ошириш орқали аҳоли фаровонлигини ошириш ва ёшларнинг интеллектуал салоҳиятини юксалтириш бўйича ишлар изчил давом эттирилади.

Шундан сўнг соҳа ходимлари ўртасида спорт мусобақалари, жумладан, футбол бўйича баҳслар ўтказилди.

***

Матбуот ва оммавий ахборот воситалари ходимлари куни  арафасида вилоят соғлиқнс сақлаш бошқармаси ташаббуси билан республика ихтисослаштирилган кардиология илмий-амалий тиббиёт маркази вилоят филиалида журналист, блогерлар ҳамда медиа соҳаси вакиллари учун чуқурлаштирилган тиббий кўрик ташкил этилди.

“Ипак йўли” туризм ва маданий мерос халқаро университетида “Вилоят ҳокими соврини учун” спорт мусобақалари бўлиб ўтди. Унда соҳа ходимлари спортнинг шахмат, шашка, стол тенниси ва бадминтон турлари бўйича беллашди.

Ўктам ХУДОЙБЕРДИЕВ.