Андроид қурилмалар учун Zarnews.uz мобил иловаси. Юклаб олиш x

Диний конфессиялар раҳбарлари мусулмонларни Рамазон ҳайити билан табриклади

Мамлакатимиз ҳудудида мусулмонлар билан бирга яна 16 та дин ва конфессияларга эътиқод қиладиган 130 дан ортиқ миллат ва элатлар яшайди. Ўзбекистон халқи қадимдан бағрикенг халқ бўлгани сабаб қадимда ҳам бугунги кунда ҳам бошқа дин ва конфессия вакиллари билан тинч тотув яшаб келмоқда. Ислом дини таълимотида ҳам ўзга дин вакилларига нисбатан бағрикенглик тамойиллари ўрин олган. Оиша онамиз розияллоҳу анҳодан ривоят қилинадики, Пайғамбар алайҳиссалом рафиқул аълога интиқол қилганларида, яъни вафот қилишларидан олдин бир яҳудийга ўз совутларини гаровга бериб, ундан 30 соъ арпа сотиб олган эканлар. Оиша онамиз розияллоҳу анҳо мана шу воқеани у зотнинг бағрикенглик борасида ўз умматларига кўрсатган энг катта таълимлари, деганлар.

Ўзбекистондаги барча диний конфессиялар вакиллари бир-бирларини диний байрамлар муносабати билан табриклаш анъанавий тарзда ўтказилиб келинади. Бугун, 5 июнь куни Ўзбекистон мусулмонлари идорасининг Самарқанд вилояти вакиллиги биносига вилоятда фаолият юритаётган диний конфессия вакиллари ташриф буюрди. Ташрифдан мақсад, бутун Ўзбекистон мусулмонларини Рамазон Ҳайити байрами билан қутлашдир. Меҳмонларни ЎМИ Самарқанд вилоят вакили З.Эшонқулов, вакил ўринбосари Х.Саттаров ва диний уламолар кутиб олишди.

Диний конфессия раҳбарлари байрам дастурхони атрофида бутун Ўзбекистон мусулмонларини Рамазон ҳайити байрами билан муборакбод этдилар. Шунингдек, улар республика президенти Ш.Мирзиёвнинг Ўзбекистонда тинчлик ва барқарорликни таъминлашга доир сиёсатини бир овоздан маъқулладилар. Ўзаро самимий ва дўстона учрашув давомида меҳмонлар Ўзбекистонда қарор топган тинчлик, тотувлик, динлар ва миллатлараро бағрикенглик руҳига юксак баҳо бериб, бу борада олиб борилаётган ишларни изчил давом эттириш зарурлигини таъкидладилар.