Пахтасаноат директорлиги учун 230 минг доллар "тўлади"

Ҳа, бу бор гап. Буни эшитган кишининг хаёлидан чет эл киноларидаги сюжетлар ўтиши табиий. Чунки йирик миқдордаги пулларнинг олди-бердиси, у билан боғлиқ жиноятларни аксарият ҳолларда хориж фильмларида кўрамиз. Оқдарёлик Жасур Латипов (исм, фамилиялар шартли) эса буни реал ҳаётда амалга оширди.

У Паст Дарғом тумани, Жума шаҳрида жойлашган “Жума пахта тозалаш заводи” товаршуноси Раъно Нодирова билан 2006 йилда танишади. Ўн йил давомида бир-бирининг мушкулини осон қилиб келган икковлон характерлари, ошна-оғайнилари ҳақида керагича маълумотга эга бўлиб қолади. Шундай кунларнинг бирида Жасур Р.Нодировага “жиддий” илтимос қилади.

- “Самарқандпахтасаноат ҳудудий филиали” масъулияти чекланган жамияти раислигига ўтмоқчиман, - дейди у. – “Гаплашинг” шу лавозимга жойлашиш учун қанча кетса бераман.

Табиийки, бу гапни эшитгандан сўнг Р.Нодированиг “ҳаловати” йўқолади.

– Керакли жойда танишларим бор, масалани ҳал қилса бўлади, – дея Раъном Ж.Латиповнинг мушкулини осон қилишга киришади.

Хурсанд бўлган Жасур дастлаб 30 минг АҚШ доллари беради. Шундан сўнг тез-тез Р.Нодировадан хабар олиб туради. Орадан бир йил ўтсада режалар натижа беравермайди, бироқ Жасур ҳам умидини узмасди. Холи-жонига қўймаган Жасурни тинчлантириш мақсадида Раъно Тошкентга сим қоқади.

– Катталар сал қаршилик қиляпти, бир иложини топамиз, шошилмай турсин, – деган жавоб эса Жасурга етарли эди. Табиийки, у буни ўз билганича тушунади ҳамда ишни тезроқ битиши учун ҳаракатини бошлаб юборади. Бир неча кундан сўнг Раъно Тошкент шаҳрига бориб, Умид Ниҳолов билан учрашади.

– Мижозингни иши ҳал бўляпти, – дейди Умид. – Яқин кунларда уни чақиртиради. Келгуси йилнинг бошидан ишига киришади. Фақатгина пулларни тўлиқ олиб келсин.

Кўп ўтмай Раъно яна Тошкентда кўриниш беради. Бу сафар у энди Жасур бериб юборган ҳужжатлар ва пулларни У.Ниҳолов етказади. Жасур Тошкент шаҳрига суҳбатдан ўтиш учун бориб, бир неча кун чақириб қолишларини кутиб чарчайди.

Тумандаги лавозимини талаб даражасида бажармаган, лавозим мажбуриятларига панжа орасидан қараб келаётагн Жасур эгаллаб турган лавозимидан озод қилинади. Шу боис Раъно иккиласининг ўртасига нифоқ тушади. “Энди пулларни қайтариб олиш керак, бироз қўрқитиб қўйсак ишимиз тезлашади”, деган ўй билан Жасур Раънонинг хонадонига шерикларини олиб боради.

– Жасур аканинг пулларини қачон қайтарасиз, – дейди ўзини Жонибек деб таништирган йигит. – Сизга бир ой муҳлат, пулларни қайтармасангиз сизга ҳеч ким ёрдам беролмайди.

Хуллас, яна ўша хорижий кинолардаги сюжетлар такрорланади. Шу боис, январ “битмаган” ишнинг хизмат ҳаққининг бир қисми май ойига келиб Жасурга қайтариб берилади.

Лавозимни сотиб олишга уриниш, унинг ортидан ноқонуний бойлик орттириш ҳеч қачон яхшиликка олиб келмаган. Жасур билан шундай бўлди. У “Пахтасаноат” ҳудудий филиали раҳбарлигига эришиш учун “тўлаган” пулини қайтариб олиш учун ҳуқуқ-тартибот идораларига мурожаат қилди.

Тергов-суриштирув ишлари давомида унинг жиноий фаолияти етарли далиллар билан ўз исботини топади. Суд мажлисида унга Жиноят Кодексининг тегишли моддаларига асосан 8 йилга озодликдан маҳрум қилиш жазоси тайинланди.

Жиноят ишлари бўйича Самарқанд шаҳар судининг ҳукмига кўра, пора предмети ҳисобланган 230 минг АҚШ доллари судланувчи Р.Нодирова ва У.Ниҳоловлардан солидар тартибда давлат фойдасига ундириш белгиланди

Т.ҚОДИРОВ,

жиноят ишлари бўйича вилоят суди судьяси.