Блогерга нисбатан кўрилган чоралар қонун доирасида амалга оширилган
2019 йил 30 декабрь куни Андижон вилояти маъмурий судининг очиқ суд мажлисида Асака тумани ички ишлар бўлими томонидан фуқаро Абдуфатто Нуритдинов (блогер Отабек Нуритдинов)га оид Ўзбекистон Республикаси Маъмурий жавобгарлик тўғрисидаги кодекснинг 40-моддаси, 41-моддаси ва 183-моддаси билан юритилган маъмурий иш кўриб чиқилган.
Суд қарорига кўра, А.Нуритдинов Маъмурий жавобгарлик тўғрисидаги кодексининг 40-моддаси, 41-моддаси ва 183-моддасида назарда тутилган ҳуқуқбузарликларни содир этганликда айбли деб топилиб, унга Маъмурий жавобгарлик тўғрисидаги кодекснинг 34-моддаси тартибида узил-кесил ўташ учун 15 сутка маъмурий қамоқ жазоси тайинланган эди.
Бугун, 2020 йил 4 январь куни Андижон вилояти маъмурий суди кассация инстанциясининг очиқ суд мажлисида ҳуқуқбузар А.Нуритдинов томонидан Андижон вилояти маъмурий судининг 2019 йил 30 декабрдаги қарори устидан кассация тартибида келтирган шикояти маъмурий иш ҳужжатлари асосида кўриб чиқилди.
Суд мажлисида ҳуқуқбузар А.Нуритдинов иштирокида жабрланувчилар ва гувоҳлар сўроқ қилинди. Ҳуқуқбузарнинг кўрсатмалари ва ҳимоячисининг музокара сўзлари тингланди.
Мазкур маъмурий иш Андижон вилояти маъмурий суди судьяси Д.Халилов раислигида кўриб чиқилди.
Суд ушбу маъмурий иш материалларини ҳар томонлама ва тўлиқ ўрганган ҳолда А.Нуритдиновнинг кассация тартибида берилган шикоятини рад қилиб, қаноатлантирилмасдан қолдириш ва Андижон вилояти маъмурий суди томонидан 2019 йил 30 декабрдаги унга нисбатан чиқарилган қарорни ўзгаришсиз қолдириш ҳақида қарор қабул қилингани маълум қилинади.
Судда раислик этувчи томонидан ишда иштирок этган шахсларга эълон қилинган қарорнинг мазмун-моҳияти ҳамда кассация инстанция судининг қароридан норози бўлган тарафлар Ўзбекистон Республикаси Олий судининг Маъмурий ишлар бўйича судлов ҳайъатига назорат тартибида шикоят билан мурожаат қилиши мумкинлиги тушунтирилди.
