ИИВ фуқароларни ижарага берилаётган дала ҳовлиларга бормасликка чақирди
Хавфсиз туризмни таъминлашни мувофиқлаштириш бошқармаси Республикамиз ҳудудида коронавирус тарқалишининг олдини олиш, санитария-эпидемиологик вазиятнинг барқарорлигини ҳамда фуқароларнинг хавфсизлигини таъминлаш мақсадида Тошкент вилояти ва республикамизнинг бошқа ҳудудларида хусусий тартибда ижарага берилаётган дала ҳовлиларга бормасликни сўради. Бу ҳақда ИИВ ахборот хизмати хабар берди.
"Дала ҳовлиларнинг қисқа муддатларга ижарага берилиши, уларга турли ҳудудлардан фуқароларнинг ташриф буюриши, аксарият дала ҳовлиларда дезинфекция тадбирлари талаб даражасида олиб борилмаслиги ва санитария-эпидемиология қоидаларига риоя қилинмаслиги каби ҳолатлар ушбу жойларда вирусли инфекциялар юқиши ва тарқалишининг юқори хавфини келтириб чиқаради. Карантин вақтида энг хавфсиз жой ўзингиз яшаб турган уйингиз эканлигини унутманг.
Ўзингиз, яқинларингиз ва бошқа фуқароларимизнинг соғлиғини асраш ўз қўлингизда!", дейилади хабарда.
