Ингичкада 40 нафар муҳтож фуқаролар янги бунёд этилган хонадон соҳибларига айланди
Мамлакатимиз Президенти ташаббуси билан амалга оширилаётган кучли ижтимоий ҳимоя сиёсати натижасида уйсиз, кам таъминланган, имконияти чекланган ва боқувчисини йўқотган оилалар ҳам ўз уй-жойларига эга бўлишмоқда.
Ўтган йили вилоят ҳокими Эркинжон Турдимов Ингичкада бўлганида маҳаллий аҳоли билан суҳбатлашиб, фуқароларнинг эҳтиёжларидан келиб чиққан ҳолда кўп қаватли уйлар қуриш, шунингдек, қўрғон шифохонасида қайта таъмирлаш ишлари ўтказиш ҳақида топшириқ берган эди. Шундан сўнг маблағ ажратилиб, қурилиш ишлари бошланди.
Бугун Абдулла Қаҳҳор маҳалласида ўша 5 қаватли уйдан эҳтиёжманд 40 оилага янги хонадонларнинг калити топширилди.
Ингичкалик Дилнавоз Эшнаева Каттақўрғон маҳалла фуқаролар йиғини, Ойбек кўчаси, 21 уйда яшайди, 1-гуруҳ ногирони. Шу кунга қадар икки оила-қариндошлари билан бир уйда яшар, тез-тез уй-жойнинг устида низо чиқиб турарди. Бугун унинг учун энг қувончли кун. Энди унинг ўз уйи бор.
– Мен жуда хурсандман, – дейди Д.Эшнаева. – Кейинги пайтлар жуда тушкунликка тушиб қолган эдим. 3 фарзандим бор, катта қизим ўзим каби ногирон. Бу уй ҳаётимни буткул ўзгартириб юборади. Уй мутлақо текин берилганидан хурсандман.
Тадбирда Каттақўрғон шаҳри ҳокими М.Ҳошимов иштирок этди.
