Иш ҳақимиздан бизнинг розилигимизсиз ушлаб қолиниши тўғрими?
Бугун АОКА ҳузуридаги штабда бўлиб ўтган брифингда Адлия вазирлиги матбуот котиби Севара Ўринбоева коронавирус билан боғлиқ вазиятга оид саволларга жавоб қайтарди:
➖ Иш ҳақимиздан ушлаб қолишмоқда. Бухгалтериядан сўрасам, раҳбарият айтган дейишяпти. Иш ҳақимизни розилигимизсиз ушлаб қолиниши тўғрими?
Амалдаги меҳнат қонунчилигига кўра, ходимнинг розилигисиз иш ҳақидан ушлаб қолиш мумкин эмас. Ходимнинг розилигисиз меҳнат ҳақидан қуйидаги ҳолларда ушлаб қолиниши мумкин:
➖ белгиланган солиқлар ва бошқа мажбурий тўловларни ундириш учун;
➖ суднинг қарорлари ва бошқа ижро ҳужжатларини ижро этиш учун;
➖ олдиндан берилган мақсадли пуллар (масалан, хизмат сафарлари учун берилган ва ишлатилмай қолинган аванс) бўйича ҳисоб-китоб қилиш ҳамда ортиқча тўланган суммани қайтариб олиш учун;
➖ меҳнат таътили бўйича ҳисоб-китоб қилиш учун;
➖ ходим томонидан иш берувчига етказилган зарарни қоплаш учун;
➖ интизомий жазо тариқасида тайинланган жаримани ундириш учун.
Иш ҳақидан ушлаб қолинадиган ҳақнинг умумий миқдори ходимнинг иш ҳақининг эллик фоизидан ортиб кетмаслиги лозим. Ушбу чеклов алимент мажбуриятлари бўйича қарздорликни ахлоқ тузатиш ишлари тарзидаги жазо тайинланган ходимнинг иш ҳақидан ушлаб қолишга нисбатан татбиқ этилмайди. Бундай ҳолларда ушлаб қолинадиган ҳақнинг миқдори етмиш фоиздан ортиб кетмаслиги лозим.
