Ish haqimizdan bizning roziligimizsiz ushlab qolinishi to‘g‘rimi?
Bugun AOKA huzuridagi shtabda bo‘lib o‘tgan brifingda Adliya vazirligi matbuot kotibi Sevara O‘rinboyeva koronavirus bilan bog‘liq vaziyatga oid savollarga javob qaytardi:
➖ Ish haqimizdan ushlab qolishmoqda. Buxgalteriyadan so‘rasam, rahbariyat aytgan deyishyapti. Ish haqimizni roziligimizsiz ushlab qolinishi to‘g‘rimi?
Amaldagi mehnat qonunchiligiga ko‘ra, xodimning roziligisiz ish haqidan ushlab qolish mumkin emas. Xodimning roziligisiz mehnat haqidan quyidagi hollarda ushlab qolinishi mumkin:
➖ belgilangan soliqlar va boshqa majburiy to‘lovlarni undirish uchun;
➖ sudning qarorlari va boshqa ijro hujjatlarini ijro etish uchun;
➖ oldindan berilgan maqsadli pullar (masalan, xizmat safarlari uchun berilgan va ishlatilmay qolingan avans) bo‘yicha hisob-kitob qilish hamda ortiqcha to‘langan summani qaytarib olish uchun;
➖ mehnat ta’tili bo‘yicha hisob-kitob qilish uchun;
➖ xodim tomonidan ish beruvchiga yetkazilgan zararni qoplash uchun;
➖ intizomiy jazo tariqasida tayinlangan jarimani undirish uchun.
Ish haqidan ushlab qolinadigan haqning umumiy miqdori xodimning ish haqining ellik foizidan ortib ketmasligi lozim. Ushbu cheklov aliment majburiyatlari bo‘yicha qarzdorlikni axloq tuzatish ishlari tarzidagi jazo tayinlangan xodimning ish haqidan ushlab qolishga nisbatan tatbiq etilmaydi. Bunday hollarda ushlab qolinadigan haqning miqdori yetmish foizdan ortib ketmasligi lozim.
