Olimlar va mutasaddilar maktab o‘qituvchilarining ochiq darslarini kuzatdi
Kattaqo‘rg‘on shahridagi 14-umumta’lim maktabida “Ta’lim muassasalarida o‘quv-metodik faoliyatni tashkil etish va mavjud muammolarni bartaraf etish yo‘llari” mavzusida o‘quv-seminar tashkil etildi.
Seminarda Qori Niyoziy nomidagi O‘zbekiston pedagogika fanlari ilmiy-tadqiqot instituti ilmiy xodimlari, viloyat xalq ta’limi boshqarmasi, tuman va shahar xalq ta’limi bo‘limlari mutasaddilari, metodistlar, maktab direktorlari va o‘qituvchilar ishtirok etishdi.
Ishtirokchilar ta’lim muassasasida yaratilgan shart-sharoitlar, Prezidentimiz tomonidan ilgari surilgan besh muhim tashabbus doirasida o‘quvchilarning san’at, sport, kompyuter savodxonligi, kitobxonligini oshirish bo‘yicha amalga oshirilayotgan ishlar bilan tanishdilar.
Maktabning tajribali o‘qituvchilari tomonidan tashkil etilgan ochiq dars va to‘garak mashg‘ulotlarini kuzatib, o‘zaro tajriba almashishdi.
Yig‘ilishda viloyat xalq ta’limi tizimida faoliyat yuritayotgan metodistlarning asosiy vazifalari, metodik xizmat ko‘rsatish sifatini yaxshilash, o‘qituvchilar o‘rtasida Bilimlar bellashuvini tashkil etish, ta’lim sifati va samaradorligini oshirish bo‘yicha kelgusida amalga oshiriladigan vazifalar haqida ma’ruzalar tinglandi. Seminar materiallarning elektron nusxalari tarqatildi.
Xuddi shunday seminarlarni viloyatning barcha tuman va shaharlarida o‘tkazishga kelishib olindi.
Dilorom ABDURAHMONOVA.
