Озиқ-овқат маҳсулотлари маркировкасида камчиликлар бор
Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўрганишларида самарқандлик ишлаб чиқарувчилар ҳам қатор камчиликларга йўл қўйганлиги аниқланган.
Амалдаги тартибга кўра, истеъмолчилар харид қилаётган озиқ-овқат маҳсулотлари ҳақида тўлиқ ва аниқ маълумотга эга бўлиши шарт. Шу мақсадда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамкор ташкилотлар билан маҳсулотларнинг қонунчилик талабларига мувофиқлигини ўрганган.
Республика бўйлаб ўтказилган ўрганишларда 298 та маҳсулот текширилиб, улардан 143 таси сут маҳсулотлари - қаймоқ, сметана, кефир, йогурт, творог, 30 таси музқаймоқ, 70 таси гўшт маҳсулотлари - сосиска ва колбаса, 55 таси нон ва булочка маҳсулотлари бўлган.
Текширувлар давомида қатор қонунбузарликлар аниқланган. Хусусан, 53,7 фоиз маҳсулотларда техник регламент ва стандартлар кўрсатилмаган, 26 фоизида ишлаб чиқарилган сана ёзилмаган, 11,8 фоизида амал қилиш муддати кўрсатилмаган, 11,1 фоизида эса сақлаш шартлари тўғрисида маълумот йўқ.
Бундан ташқари, ўрганилган 3,7 фоиз маҳсулотларда ишлаб чиқарувчи номи ва манзили, 0,7 фоизида маҳсулотнинг савдо номи кўрсатилмаган.
Мисол учун, Самарқанддаги “PURE MILKY WORKS” хусусий корхонаси ишлаб чиқараётган сут ва сут маҳсулотларида техник регламент ва партия рақами кўрсатилмаган. “BAXT” корхонаси ишлаб чиқараётган колбасаларда ишлаб чиқариш санаси ва сақлаш муддати ҳамда маҳсулотга қўшилган товуқ терисининг миқдори ва ўлчами йирикроқ ёзилмаганлиги аниқланган. “AGRO BRAVO” МЧЖ ишлаб чиқараётган музқаймоқларда техник регламент ва партия рақами кўрсатилмаган.
Қўмита аниқланган камчиликларни бартараф этиш бўйича зарур чора-тадбирларни амалга оширган.
Қайд қилинишича, истеъмолчиларнинг ҳуқуқларини ҳимоя қилиш борасида бу каби текширувлар доимий равишда олиб борилади. Харидорлар аниқ ва ишончли маълумотга эга бўлиши учун маҳсулотларнинг қонуний талабларга жавоб беришини таъминлаш ишлаб чиқарувчиларнинг бурчидир. Қўмита бу масалада назоратни кучайтириб, зарур ҳуқуқий чораларни кўришда давом этади.
