Қимматга тушган хато
Ўзбек детектив жанри номояндаларидан бири Комил Синдаровнинг ана шу номдаги асари инглиз тилига таржима қилиниб, “Lust for Revenge” номи остида чоп этилди.
Қувонарлиси, бу китоб АҚШдаги “Xlibris Us” нашриёти томонидан шу йил бошидан буён нашр қилинган ёзувчининг иккинчи асари ҳисобланади. Ноширлар буни ўзбек детектив асарларига талаб тобора ортиб бораётгани билан изоҳлашяпти.
Бинобарин, Комил Синдаровнинг “Темурийлар кутубхонаси сири” (“The Secret of Temurid Library”) романи нафақат АҚШ, балки инглиз тилида сўзлашувчи дунё китобхонлари томонидан катта қизиқиш, зўр иштиёқ билан кутиб олинди. Шу боис нашриёт жамоаси муаллифнинг бошқа детектив асарларини ҳам инглиз тилида чоп этишга қарор қилди.
Айтиш жоизки, “Қимматга тушган хато” асари аллақачон ўзбек ўқувчилари томонидан севиб мутолаа қилинадиган китоблар қаторидан жой олган. Чунки у ҳаётий воқеаларга асосланган бўлиб, сюжетининг жумбоқлилиги, воқеаларнинг ғайриоддий ривожи ўқувчини ром этиб қўяди. Киши китобнинг илк саҳифалариданоқ воқеалар ичига шўнғиб кетади.
Асар ўз хизмат вазифасини фидокорона адо этиб келаётган прокуратура бўлим бошлиғининг сирли тарзда ғойиб бўлиши воқеаси билан бошланади. Ўз касбининг фидойиси, бир оила бошлиғининг келгуси тақдири қандай кечади?
Муаллиф йўқолган масъул ходимни излашда гумон қилинган шахсларни аниқлаш, тергов қилиш жараёни, оиласи, қариндош-уруғларининг чеккан жафолари, таҳликали ўтган кунларини ўта маҳорат билан ҳикоя қилади. Шунинг учун ўқувчи қаҳрамонларнинг руҳий ҳолатлари, аламли кечинмалари, қувончу шодликларига шерик бўлади, асар билан яшай бошлайди.
Назаримизда, Комил Синдаров узоқ йиллар давомида прокуратура тизимида меҳнат қилиб, катта касбий тажрибага эга бўлгани асар муваффақиятининг бош омилларидан бири ҳисобланади. Зеро, ушбу китоб дунё юзини кўргач, рус тилига таржима қилиниб, кенг китобхонлар ўртасида “Жажда мести” номи билан шуҳрат қозонган эди. Асарнинг инглиз тилига ўгирилиши унинг ўқувчилар қалбидан мустаҳкам жой эгаллаганидан ёрқин далолат.
Бугунги кунга қадар сермаҳсул ижодкор Комил Синдаровнинг ўндан ортиқ детектив асарлари эълон қилинган. Уларнинг аксарияти хорижий тилларга таржима қилинмоқда.
Шубҳасиз, бу ўзбек детектив жанри юқори поғонага кўтарилиб бораётганини англатади.
