Рейд – автомобилсиз кун деганими?
– Тинчликми, яна нима бўлди, ишга кечикяпмиз, ахир…
– Узр, бугун рейд бўлаяпти экан, битта «путёвкага» қўл қўйдириб чиқмасам бўлмайди.
Аксига олиб, шу куни «путёвка» ҳам навбат экан яна кутишга тўғри келди – 08:55. Навбат етиб келгач, бир дақиқада ҳайдовчимиз, тиббий кўрикдан ўтиб(!), машинасини техник кўрикдан ўтказиб (!) чиқди. Аммо «Кафтархона» маҳалласидан ўтгач, тўғри йўл қолиб айланма йўлга бурилди.
– Оббо, ҳужжатни олган бўлсангиз, энди нега тўғри йўлдан бормаяпсиз?
– Ака, аслида «Тайлоқ – Университет хиёбони» деган йўналиш йўқ. Йўлланмам, кафтархонагача, буёғига «ГАИ»дан эҳтиёт бўлмасам бўлмайди…
Шу куни амин бўлганим шуки, тумандаги «Дамас»ларнинг ярмидан кўпи ноқонуний йўловчи ташийди. Тўсатдан рейд бошланса бизга ўхшаганлар деярли кўчада қолади. Маҳаллаларда кўчада одамлар тўлиб кетади машина кутиб. Ачинарли томони шундаки, маҳалладан туманга қатнайдиган «дамас»лар неча йилдан бери «овланади». Аммо бирор марта ана шу йўналишларда ҳам қонуний йўналишлар очиш, бу йўналишларда йўловчилар фақат эрталаб ва кечқурун қатнашини ҳисобга олиб лицензияларни сал ҳаётга яқинроқ қилиб белгилаш ҳеч кимнинг хаёлига келмаяпти. Йўловчи ташиш учун лицензия нархи бир неча миллион сўм, бундан ташқари кунлик тўловлар ҳам 350 минг сўмгача бўлгач, нисбатан йўловчи кам ҳудудларда ҳеч ким лицензия талабларини бажара олмайди. Шундай бўлгани учун ҳозир вилоятдаги бутун бошли туманларда 20-30 та қонуний такси бор, холос. Ҳар сафар рейд ўтказилиб, улар жаримага тортилиши қонуний, аммо, бунинг ўрнига легаллаштириш, лицензия муаммоларини ўрганиш яхшироқ бўларди.
Анвар МУСТАФОҚУЛОВ.
