Сенегалдан Африка чемпионлиги олиб қўйилди
Марокаш терма жамоаси финалдан икки ой ўтиб, Африка миллатлар кубоги ғолиби деб топилди.
Бундан икки ой олдин Африка Миллатлар кубоги финалида Сенегал терма жамоаси норозилик сифатида майдонни тарк этганди. Бироқ жамоа етакчиси Садио Мане шерикларини ортга қайтишга чақирди. Биринчи экстра-таймнинг 4-дақиқасида Пап Гейе Сенегални ҳисобда олдинга олиб чиқиб, якунда унинг голи жамоага ғалаба келтирганди.
Бироқ Сенегал терма жамоасидан чемпионлик олиб қўйилди. Бунга жамоанинг норозилик ўлароқ майдонни тарк этгани сабаб бўлган ва АФК томонидан Марокаш терма жамоаси қитъа чемпиони сифатида эълон қилинган.
“Африка футбол конфедерацияси апелляция кенгаши Африка миллатлар кубоги (AFCON) регламентининг 84-моддасига мувофиқ, Сенегал термаси финал учрашувини техник мағлубият билан ютқазган дея қарор қилди.
Шу муносабат билан Африка миллатлар кубоги финал учрашувида Марокаш терма жамоаси 3:0 ҳисобида ғалаба қозонган деб топилди”, дейилади АФК берган расмий баёнотда.
Сенегал терма жамоаси етакчиси Садио Мане Африка чемпионлигини олиб қўйилганидан сўнг кескин муносабат билдирди.
“Юз берган воқеа ҳаддан ташқари чуқурлашиб кетди. Бу биз курашаётган футбол эмас ва биз ишонадиган Африка ҳам эмас.
Бизнинг футболда жуда кўп коррупция бор ва бу бутун қитъа бўйлаб миллионлаб мухлисларнинг иштиёқини ўлдирмоқда. Ўйинчилар майдонда бор кучини сарфлайди, лекин майдондан ташқаридаги қарорлар ўйин натижасини ҳал қилади ва совринлар тақдирини белгилайди.
Мен нафақат Сенегал учун, балки бутун африкалик футбол учун ҳам чуқур ҳафсалам пир бўлди. Биз яхшироқ нарсага лойиқмиз. Мухлислар адолат, ошкоралик ва ҳурматга лойиқ”, деб фикр билдирган футболчи.
