Сув таъминоти ва канализация объектларини бошқаришда хусусий сектор ҳам жалб қилинади

Қарорда кўрилаётган чора-тадбирларга қарамасдан ичимлик суви таъминоти ва канализация соҳасида белгиланган тадбирларни амалга оширишга тўсқинлик қилаётган қатор ҳал этилмаган муаммолар ҳамон мавжудлиги эътиборга олинган ҳолда соҳани ривожлантиришнинг устувор вазифалари белгилаб берилган.

 Жумладан,

• сув таъминоти ва канализация корхоналарини, шу жумладан, давлат-хусусий шериклик шартлари асосида бошқариш ҳамда улардан фойдаланиш соҳасида илғор хорижий тажрибани босқичма-босқич жорий қилиш;

• сув таъминоти ва канализация соҳасида ҳисобга олиш ҳамда мониторинг қилишни таъминлайдиган замонавий ахборот ва ресурс тежовчи технологияларни жорий этиш, республикадаги барча истеъмолчиларни ичимлик сувини ҳисобга олувчи замонавий асбоблар билан жиҳозлаш;

• тураржой комплексларини қуришда санитария талабларини, шу жумладан, маҳаллий тозалаш иншоотларини қўллаш орқали таъминлаш мақсадида канализация объектларини ичимлик суви таъминоти объектлари билан биргаликда лойиҳалаштириш, қуриш ҳамда реконструкция қилиш;

• ичимлик суви ишлаб чиқариш ва сотиш харажатларини ўзи тўлиқ қоплашини таъминлайдиган, сув таъминоти ҳамда канализация объектларини бош­қариш ва улардан фойдаланишга хусусий секторни жалб қилиш имконини берадиган янги тариф сиёсатини ишлаб чиқиш орқали сув таъминоти ва канализация корхоналарининг молиявий барқарорлигини мустаҳкамлаш белгилаб берилган.

– Қарорда соҳага хусусий секторни жалб этиш билан бирга, тармоқнинг инвестициявий жозибадорлигини ошириш бўйича вазифалар ҳам кўрсатиб ўтилган, – дейди вилоят "Сувоқова" ишлаб чиқариш давлат корхонаси бошлиғи Комил Юсупов. – Хусусан, тўғридан-тўғри, аввало, хорижий инвестицияларни жалб қилиш, илғор ахборот-коммуникация технологиялари ва инновацион ечимлар, шунингдек, ичимлик сувини ҳисоблашнинг замонавий асбобларини жорий этиш каби топшириқлар соҳани молиявий жиҳатдан оёққа турғазишда муҳим аҳамиятга эга. Бу эса ўз-ўзидан таъминот ва хизмат кўрсатиш сифати ошишига олиб келади.