“Устоз АИ” қандай лойиҳа? Ёшлар ундан нималарни ўрганиши мумкин?

Туманларда ўтказилаётган ёшлар фестивали доирасидаги тадбирларда қатнашиб, айрим ёшлар билан суҳбатлашдим, уларнинг орзу интилишлари билан қизиқдим. Аксарияти замонавий ахборот технологиялари ва чет тилларни ўрганишга ҳаракат қилаётгани ҳақида гапириб берди. Ёш суҳбатдошларимдан айнан улар қизиққан йўналишлар бўйича Ёшлар ишлари агентлиги томонидан ишга туширилган янги лойиҳалар “Ибрат фарзандлари”, “Мутолаа” ҳамда “Устоз АИ” ҳақида сўраганимда, кўпчилиги бу лойиҳалар ҳақида тўлиқ маълумотга эга эмаслигини айтди.  

Бошқа ҳудудларда бўлгани каби бугун Паст Дарғом туманида ўтказилаётган фестивал доирасидаги тадбирлардан бири айнан шу лойиҳалар тақдимотига бағишланди.

- Бугун фестивалда қатнашиб, билимимни бойитяпман, - дейди тадбир иштирокчиларидан бири Орифжон Олимов. – Фестивалда “Устоз АИ” тақдимоти бўлиб ўтиши ҳақида эшитганимда, қайсидир ўқитувчи, масалан, Алишер Исроилов деган устоз қандайдир тақдимот ўтказса керак, деб ўйлагандим. Тадбирда қатнашиб, бу бошқа бир лойиҳа эканлигини билдим. “Устоз АИ”даги АИ ҳарфлари “Артифиsиал Интеллигенsе” сўзларининг қисқартмаси экан. Яъни бу сунъий интеллект деган маънони бераркан. Бу биз ёшларни график дизайнер, видеомонтаж, анимация, маркетинг устаси сингари 40 та замонавий касбга ўқитиш учун ишлаб чиқилган платформа бўлиб, ундан устозаи.уз вебсайти орқали фойдаланишимиз мумкин экан.

Ҳа, яна бир жиҳати, унда нафақат ёшлар, балки истаган киши замонавий касбларни ўрганиши мумкин. Курс якунида дастурнинг ўзи имтиҳон олади ва эгалланган касб бўйича сертификат беради. Бу жараёнларнинг барчаси бепул.

 Тўлқин СИДДИҚОВ.

Тўлқин СИДДИҚОВ.