Вашингтон баҳоси шубҳа остида: Эрон зарбалари қанчалик самарали бўлган?
BBC Verify лойиҳаси журналистлари сунъий йўлдош тасвирлари ва видеолар таҳлили асосида Эрон уруш бошланганидан бери Яқин Шарқдаги камида 20 та АҚШ ҳарбий объектига зарба берган, деган хулосага келди.
Текширув натижаларига кўра, Теҳроннинг жавоб ҳужумлари аввал расмий Вашингтон томонидан айтилганидан кўра анча аниқ ва самарали бўлган.
АҚШ маъмурияти Эроннинг ҳарбий салоҳияти деярли йўқ қилинганини бир неча бор таъкидлаган. Бироқ мустақил таҳлиллар ва сунъий йўлдош тасвирлари Америка ҳарбий инфратузилмасига сезиларли зарар етказилганини кўрсатмоқда. Айрим баҳолашларга кўра, урушнинг дастлабки икки ҳафтасида АҚШ билан боғлиқ ҳарбий объектларга етказилган зарар ҳажми 800 миллион долларга яқинлашган.
Тергов материалларига кўра, зарбалар Саудия Арабистони, Бирлашган Араб Амирликлари, Қатар, Қувайт, Ироқ, Иордания, Баҳрайн ва Умонда жойлашган объектларга йўналтирилган. Баъзи таҳлилчилар ҳужумга учраган АҚШ объектлари сони 28 тагача етиши мумкинлигини билдирмоқда.
Айни пайтда АҚШ ва Эрон ўртасидаги кескинлик сақланиб турибди. Сўнгги кунларда АҚШ ҳарбийлари Эроннинг радар ва дрон бошқарув объектларига янги зарбалар берганини маълум қилди. Теҳрон эса жавоб тариқасида АҚШ фойдаланадиган ҳарбий авиабазага ҳужум қилинганини билдирди. Шу билан бирга, томонлар ўртасида ўт очишни тўхтатиш ва можарони сиёсий йўл билан ҳал этиш бўйича музокаралар давом этмоқда.
Ҳурмўз бўғозида ҳам вазият таранглигича қолмоқда. Дунё нефтининг катта қисми ташиладиган ушбу стратегик сув йўлида кемалар ҳаракати ҳануз чекланган. АҚШ ва Эрон ўртасидаги музокараларда бўғоздаги ҳаракатни тўлиқ тиклаш масаласи муҳокама қилинмоқда, аммо ҳозирча аниқ келишувга эришилмаган. Сўнгги кунларда минтақада янги ҳарбий тўқнашувлар қайд этилган. Натижада нефть бозорида беқарорлик кучайиб, жаҳон нархларига босим ортган.
