Ёшлар ўқув машғулотларида иштирок этди
“Самарқанд” ташқи иқтисодий фаолият божхона постида зилзила, ёнғин ва унинг оқибатларини олдини олиш ва бартараф этиш мавзусида махсус-тактик ўқув-машғулот ўтказилди.
Вилоят божхона бошқармаси ва “Божхона-сервис” давлат муассасаси ходимлари божхонага қарашли омбор мудирлари ҳамда ўқувчи-ёшлар иштирок этган тадбирда фавқулодда ҳолатлар ва унинг оқибатларини бартараф этишда тўғри ҳаракатланиш, махсус техник воситалардан фойдаланиш тартиблари кўрсатиб берилди.
Шунингдек, тадбирда зилзила пайтида ҳамда ўт ўчириш учун зарур бўладиган замонавий техник воситалар кўргазмаси намойиш этилди. Фавқулодда вазиятлар бошқармаси ходимлари томонидан ташкил этилган амалий машғулотларда ёнғин содир этилганда уни бартараф этиш чоралари кўрилди.
Бундан ташқари, божхона омбори раҳбарлари ва омбор мудирларига мутахассислар томонидан куз-қиш мавсумига тайёргарлик кўриш,ёнғин хавфсизлигига риоя этиш, омборларда товарларни сақлаш ва уларни назорат қилиш тартиблари юзасидан кўрсатмалар берилди.
Анвар Турдиқулов,
вилоят ФВБ ҳаёт фаолияти хавфсизлиги
ўқув маркази ўқитувчиси.
