15 минг йигит-қиз ҳайдовчилик гувоҳномаси учун бепул ўқитилади
Бу маълумот Ўзбекистон мудофаасига кўмаклашувчи “Ватанпарвар” ташкилоти раҳбарининг ёшларга йўллаган мурожаатномасида келтирилган.
Яқинда Ўзбекистон мудофаасига кўмаклашувчи “Ватанпарвар” ташкилоти ва Ёшлар ишлари агентлиги раҳбарлари ёшларга мурожаат қилди. Шу муносабат билан ташкил этилган тадбирнинг асосий қисми пойтахтимиздаги “Ёшлар ижод саройи”да бўлиб ўтди. Видеоконференц алоқа орқали йўлланган мурожаатни вилоятимиздаги ёшлар вакиллари Самарқанд шаҳридаги ёшлар марказида онлайн тинглаб кузатди.
- Кейинги вақтларда мамлакатимизда ишсиз, ёрдамга муҳтож ёшларга алоҳида эътибор қаратиляпти, - дейди “Ватанпарвар” ташкилоти раиси Ҳусан Ботиров. - Жорий йилнинг 1 апрелидан “Ёшлар дафтари” рўйхатидаги 15 мингга яқин йигит-қизлар “Ватанпарвар” ташкилотининг ўқув муассасаларида бепул ўқитилиши режалаштирилган. Ўқув машғулотларида ёшлар дастлаб енгил ва юк автомобиллари, автобус ҳайдовчилигига, кейинги босқичларда эса автоэлектрик, пайвандловчи ва бошқа 10 дан зиёд касб-ҳунарга ўқитилади.
Тадбирда Ёшлар ишлари агентлиги директори А.Саъдуллаев ҳам ёшларга мурожаат қилди. Агентлик томонидан амалга оширилаётган ишлар, “Ватанпарвар” ташкилоти билан ҳамкорлик, келгусидаги режалар хусусида маълумот берди.
Тадбир доирасида автомототранспорт воситалари ва спорт техникалари, ҳарбий қурол-аслаҳалар кўргазмаси, мусиқий дастурлар намойиш этилди.
Тўлқин Сиддиқов.
