“Bahodir Yalangto‘sh” tarixiy filmi suratga olinmoqda
Registonning Sherdor va Tillakori madrasalarini bunyod etgan Bahodir Yalangto‘sh haqida hikoya qiluvchi “Bahodir Yalangto‘sh” tarixiy filmining s’yomka ishlari davom ettirilmoqda.
Film eng yuqori zamonaviy badiiy va texnologik saviyada suratga olish imkonini beradigan“O‘zbekfilm” kinokonserni”ning yangi panoramali pavilonida olinmoqda. Agar ilgari yirik blokbasterlar va jangovar filmlar xromakey yordamida suratga olingan bo‘lsa, bugun Stage craft texnologiyasidan foydalanish bilan hammasi global miqyosda o‘zgaradi. Texnologiya bitta pavilonning o‘zida yuqori sifatli tasvirni olish imkonini beradi. Qimmatbaho dekoratsiyalar o‘rniga sahnaning orqa tomoniga kerakli atmosferani to‘liq yetkazib bera oladigan yirik LED panellar o‘rnatilgan.
Natijada virtual olamning yuqori sifatli tasviri ekranda aks ettiriladi va operator kamerasiga hech qanday qiyinchiliklarsiz bog‘lanadi. Ob’yektlarning fondagi holatini kameraning joylashishiga qarab o‘zgartirish sifatli film suratga olish imkonini beradi.
Mazkur yangi pavilion “Ipak yo‘li durdonasi” XIV Toshkent xalqaro kinofestivali doirasida taqdim etilgan bo‘lib, unda festival mehmonlari “Bahodir Yalangto‘sh” tarixiy filmining birinchi epizodi suratga olinganini bevosita ko‘rishgan edi. Mehmonlar rejissyor kamerasida film qanday suratga olinayotganini tomosha qilish, ijodiy jamoa va film aktyorlari bilan yaqindan tanishish imkoniga ega bo‘lgandi.
