Бугун Самарқандда жам бўлди дунё!
Келажак! Нурафшон ҳикоя учун,
Адолат қарорин ҳимоя учун,
Урчиган зулмга ниҳоя учун,
Юксак кўтарувчи бир ғоя учун, —
Собитлик йўлида интилган дунё,
Бугун Самарқандда жам бўлган дунё!
Ниятлар холисдир, орзулар бисёр,
Деганча, тинчликдан бошқаси бекор,
Инсонлар заррача чекмасин озор,
Ёмонлик кўрмасин бу олам зинҳор, —
Собитлик йўлида интилган дунё,
Бугун Самарқандда жам бўлган дунё!
Амир Темур руҳи бўлмиш бугун шод,
Муқаддас маскани озоду обод,
Ижобат бўлгайдир мақсаду мурод,
Меҳрдан манзиллар этилган бунёд, —
Собитлик йўлида интилган дунё,
Бугун Самарқандда жам бўлган дунё!
Тамаддун шу ердан ташлаган қадам,
Машриқу Мағрибни боғлаган маҳкам,
Нурли тарихларни битганда қалам,
Илму фан, маърифат, ҳикмати бекам, —
Собитлик йўлида интилган дунё,
Бугун Самарқандда жам бўлган дунё!
Мирзо Улуғбекнинг нафаси билан,
Шодлик келар шодон, ҳур саси билан,
Улкан орзуларнинг эвази билан,
Кўнгилда кўз ёрган ҳаваси билан, —
Собитлик йўлида интилган дунё,
Бугун Самарқандда жам бўлган дунё!
Ғарбга ботган қуёш Шарқда бўлиб тонг,
Ошиқар Регистон дийдори томон,
Кунлар келгани рост чин дориламон,
Олқишлар еру кўк, олқишлар замон, —
Собитлик йўлида интилган дунё,
Бугун Самарқандда жам бўлган дунё!
Қушларнинг парвози кўкларга етар,
Боғлару тоғларга етди хушхабар,
Кучоқ очар бунда ҳар кент, ҳар шаҳар,
Минглаган дилларнинг орзуси қадар, —
Собитлик йўлида интилган дунё,
Бугун Самарқандда жам бўлган дунё!
Дунёда не кечар? Мазлумлик, азоб...
Ёвузлик чанг солар дилларга шитоб,
Бу бахтли кунларнинг ўзи минг китоб!
Дўстлик байроғини кўтариб бу тоб, —
Собитлик йўлида интилган дунё,
Бугун Самарқандда жам бўлган дунё!
Бу ҳикмат азалдан келган талъатдир:
Бирлашган йўлларнинг гарди баланддир,
Бирлашган дилларнинг қадри баланддир,
Бирлашган элларнинг қадди баланддир, —
Собитлик йўлида интилган дунё,
Бугун Самарқандда жам бўлган дунё!
Бирлашмоқ бахш этгай албат улуғ ном,
Дилларда минг сурур, қалбларда илҳом,
Яхшилик ташрифи этади давом,
Айни баҳор чоғи, қутлуғ бу айём, —
Собитлик йўлида интилган дунё,
Бугун Самарқандда жам бўлган дунё!
Ҳар эзгу юракни асрар Самарқанд,
Ўзи асраб яна яйрар Самарқанд,
Тинчлик қўшиғини куйлар Самарқанд,
Бугун дун аҳлига минбар Самарқанд, —
Собитлик йўлида интилган дунё,
Бугун Самарқандда жам бўлган дунё!
Сўнмас бўлсин токи қалблар қуёши,
Баланд бўлсин элнинг қадрию боши,
Фақат шуни тилар бугун Юртбоши,
Олам аҳли бўлиб бугун йўлдоши, —
Собитлик йўлида интилган дунё,
Бугун Самарқандда жам бўлган дунё!
Самарқанд! Юртимнинг бошидаги тож,
Эй сен сахий қуёш, меҳрибон қуёш,
Яхшилик нурини бошлар узра соч,
Тинчлик, эзгуликка мудом қучоқ оч, —
Мудом эзгуликка интилсин дунё,
Мудом Самарқандда жам бўлсин дунё!
Ўткир РАҲМАТ.
