Bugun Samarqandda jam bo‘ldi dunyo!
Kelajak! Nurafshon hikoya uchun,
Adolat qarorin himoya uchun,
Urchigan zulmga nihoya uchun,
Yuksak ko‘taruvchi bir g‘oya uchun, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Niyatlar xolisdir, orzular bisyor,
Degancha, tinchlikdan boshqasi bekor,
Insonlar zarracha chekmasin ozor,
Yomonlik ko‘rmasin bu olam zinhor, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Amir Temur ruhi bo‘lmish bugun shod,
Muqaddas maskani ozodu obod,
Ijobat bo‘lgaydir maqsadu murod,
Mehrdan manzillar etilgan bunyod, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Tamaddun shu yerdan tashlagan qadam,
Mashriqu Mag‘ribni bog‘lagan mahkam,
Nurli tarixlarni bitganda qalam,
Ilmu fan, ma’rifat, hikmati bekam, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Mirzo Ulug‘bekning nafasi bilan,
Shodlik kelar shodon, hur sasi bilan,
Ulkan orzularning evazi bilan,
Ko‘ngilda ko‘z yorgan havasi bilan, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
G‘arbga botgan quyosh Sharqda bo‘lib tong,
Oshiqar Registon diydori tomon,
Kunlar kelgani rost chin dorilamon,
Olqishlar yeru ko‘k, olqishlar zamon, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Qushlarning parvozi ko‘klarga yetar,
Bog‘laru tog‘larga yetdi xushxabar,
Kuchoq ochar bunda har kent, har shahar,
Minglagan dillarning orzusi qadar, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Dunyoda ne kechar? Mazlumlik, azob...
Yovuzlik chang solar dillarga shitob,
Bu baxtli kunlarning o‘zi ming kitob!
Do‘stlik bayrog‘ini ko‘tarib bu tob, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Bu hikmat azaldan kelgan tal’atdir:
Birlashgan yo‘llarning gardi balanddir,
Birlashgan dillarning qadri balanddir,
Birlashgan ellarning qaddi balanddir, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Birlashmoq baxsh etgay albat ulug‘ nom,
Dillarda ming surur, qalblarda ilhom,
Yaxshilik tashrifi etadi davom,
Ayni bahor chog‘i, qutlug‘ bu ayyom, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Har ezgu yurakni asrar Samarqand,
O‘zi asrab yana yayrar Samarqand,
Tinchlik qo‘shig‘ini kuylar Samarqand,
Bugun dun ahliga minbar Samarqand, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
So‘nmas bo‘lsin toki qalblar quyoshi,
Baland bo‘lsin elning qadriyu boshi,
Faqat shuni tilar bugun Yurtboshi,
Olam ahli bo‘lib bugun yo‘ldoshi, —
Sobitlik yo‘lida intilgan dunyo,
Bugun Samarqandda jam bo‘lgan dunyo!
Samarqand! Yurtimning boshidagi toj,
Ey sen saxiy quyosh, mehribon quyosh,
Yaxshilik nurini boshlar uzra soch,
Tinchlik, ezgulikka mudom quchoq och, —
Mudom ezgulikka intilsin dunyo,
Mudom Samarqandda jam bo‘lsin dunyo!
O‘tkir RAHMAT.
