Елена Асланова: «Қизларни спортда ушлаб қолиш — энг қийини»
Самарқандда бадиий гимнастика ҳақида гап кетганда, албатта, Елена Асланова номи тилга олинади. Зеро, қарийб эллик йиллик фаолияти давомида у ўнга яқин жаҳон чемпиони ҳамда мураббийларнинг бутун бир авлодини тарбиялади.
Бугунги кунда вилоятдаги бадиий гимнастика бўйича мутахассисларнинг 99 фоизи унинг шогирдлари. Яқинда Елена Асланованинг хизматлари эътироф этилиб, у «Ўзбекистон Республикасида хизмат кўрсатган спорт устози» фахрий унвони билан тақдирланди.
42 йиллик расмий иш стажи давомида у оддий мураббийликдан вилоят бадиий гимнастика бўйича терма жамоасининг бош мураббийлигигача бўлган йўлни босиб ўтди. Бугунги кунда Елена Юрьевна вилоят гимнастикага ихтисослаштирилган мактабининг бош мураббийи бўлиб ишламоқда.
Ёшига ва бой билим ҳамда тажрибасига қарамай, у бугун ҳам 59 ёшида ўрганишда давом этмоқда.
- Вилоятдаги деярли барча мураббийлар менинг шогирдларим, — дейди Елена Асланова. — Биз биргаликда, аҳил жамоа бўлиб ишлаймиз. Баъзида улар менга ниманидир маслаҳат бериб туради. Мен уларнинг маслаҳатларини мамнуният билан қабул қиламан. Қизларим билан жуда яхши, ишончли муносабатлар шаклланган ва аллақачон «ўқитувчи — ўқувчи» форматидан чиқиб, ҳамкасблар ўртасидаги муносабатга айланган.
Елена Юрьевна шаънига илиқ сўзларни унинг ҳар бир шогирдидан эшитиш мумкин. Кўпчилик эришган ютуқларининг 99 фоизи унинг хизмати эканини тан олади. Асланова шогирдларининг бугунги кунда ўз шогирдлари бор ва улар ҳам мураббийга айланишган.
Мураббийлик фаолияти йилларида Елена Юрьевна 38 нафар спорт устасини тарбиялади. Улардан тўрт нафари халқаро миқёсдаги спорт устаси бўлди. Унинг машҳур шогирдлари орасида Мафтуна Шамсиева, Нуринисо Усмонова, Тахмина Икромова, Амалия Ахмедова ва Вилана Савадянлар бор.
Шогирдларидан қайси бири билан ишлаш энг қийин бўлгани ҳақидаги саволга у табассум билан Тахмина Икромованинг номини тилга олади.
- Тахминанинг ўзига хос характери бор, — таъкидлайди мураббий. — Агар у ниманидир хоҳламаса, уни мажбурлашнинг иложи йўқ. Соатлаб у билан гаплашиб, бу, энг аввало, ўзи учун зарурлигини тушунтиришга тўғри келарди. Биринчи машғулотларданоқ Тахминада бадиий гимнастика бўйича жаҳон юлдузи бўлиш учун иқтидор борлигини ҳис қилганман.
Суҳбатни давом эттирар экан, Елена Юрьевна мураббий ишидаги энг қийин нарса янги бошлаган спортчилар билан шуғулланиш эмас, балки улғайган қизни спортда ушлаб қолиш эканини таъкидлайди.
- Ўсмирлик ёшида уларда характер ёрқин намоён бўла бошлайди ва мураббийнинг танбеҳини жуда оғир қабул қилишади, — дейди у. — Бундай пайтларда мураббий руҳшуносга айланиши, у ёки бу танбеҳнинг муҳимлигини юмшоқ, билдирмасдан изоҳлаб бериши керак. Вақт ўтиши билан бу давр ўтади ва спортчи яна одатий машғулот ўзанига қайтади.
Елена Асланова кўп йиллик меҳнатлари учун «Дўстлик» (2012 йил) ва II даражали «Соғлом авлод учун» (2022 йил) орденлари билан тақдирланган. «Ўзбекистон Республикасида хизмат кўрсатган спорт устози» фахрий унвони у учун айниқса қадрли.
Мураббийга эришилган ютуқларда тўхтаб қолмасликни тилаб қоламиз. Зеро, олдинда гимнастикада ўз йўлини эндигина бошлаётган кўплаб ёш спортчилар кутмоқда.
Малика Абайдулина.
