Ҳаёти ибрат эди
Гап 1959 йилда Нурота туманида туғилган Райимқул Ўролов ҳақида бормоқда. У кишининг ҳаёт мактаби ҳақиқатда кўпчиликка ибрат эди.
Устоз ўрта маълумот билан дастлабки меҳнат фаолиятини Жиззах вилояти Мирзачўл туманидаги 11-мактабнинг бошланғич синф ўқитувчиси сифатида бошлади. 1984 йилда Низомий номли Тошкент давлат педагогика институтининг тасвирий санъат, чизмачилик ўқитувчиси мутахассислиги факультетини битиргач, Жиззах вилояти педагогик кадрларни қайта тайёрлаш ва малакасини ошириш институти тасвирий санъат ва чизмачилик кабинет мудири сифатида фаолиятини давом эттирди. Райимқул ака бу масканда 10 йил давомида институтнинг ўқув услубий бўлими бошлиғи, ахборот таҳлил оммалаштириш ва нашриёт бўлими бошлиғи вазифаларида самарали меҳнат қилиб, юзлаб шогирдлар чиқарди.
2005 йилдан Самарқанд педагогика коллежи тасвирий санъат фани ўқитувчиси бўлиб ишини давом эттириб, таълим-тарбия соҳасига муносиб ҳисса қўшди. Катта тажрибага эга педагог кўплаб шогирдлар тайёрлаб, ўзининг билим ва тажрибаси, юксак касбий маҳорати ва инсоний фазилатлари билан ҳамкасблари ва талабаларнинг чуқур ҳурматини қозонган инсон эди.
Райимқул Ўролов нафақат педагог устоз, катта ўқитувчи, иқтидорли рассом, балки моҳир нотиқ эканлигини узоқ йиллар Самарқанд педагогика коллежидаги самарали фаолияти давомида кўришимиз мумкин. У киши сўз санъатини яхши эгаллаган, таъсирчан нутқлари билан тингловчилар қалбидан жой олган моҳир нотиқ сифатида ҳам эътироф этилганлигини кўпчилик яхши билади.
Раимқул Ўроловнинг оиласини намунали педагоглар оиласи дея баралла айта оламиз. Турмуш ўртоғи Зулхумор ая ҳам узоқ йиллар мактабда ўқитувчи бўлган. Қизлари Шаҳло, Камола, Хуршида ҳам ота-онасининг изидан бориб, машаққатли, аммо шарафли бўлган ўқитувчилик фаолиятини давом эттирмоқда.
Р.Ўролов Самарқанд шаҳрининг Сартепа масканидаги Извошчилар маҳалласида истиқомат қилган. Маҳалладагилар ҳам у кишини яхши ташаббускор ва камтар инсон эканлигини кўп бора таъкидлаб келади.
Оилада меҳрибон ота, садоқатли турмуш ўртоқ ва яхши инсон сифатида ҳам барчага намуна бўлиб келган. Албатта, маҳоратли педагог устоз ҳақиқий маънода маърифатли инсон эди.
Раимқул ака яқинда 67 ёшида вафот этди. Устоз яратган мактаб нафақат бугунги кунда, балки келажакда ҳам ўз фаолиятини давом эттиради.
Бир гуруҳ ҳамкасблари.
