Ҳиндистонга ҳеч қандай ҳужжатсиз киришга уринган Ўзбекистон фуқароси ушлангани айтилмоқда

Ҳиндистонга Биҳар штатидаги Ситамарҳи туманида Непалдан ноқонуний тарзда киришга уринаётган Ўзбекистон фуқароси ушланди.

Ўзини Ўзбекистон фуқароси деб таништирган Х.М. исмли шахснинг ёнида амалдаги паспорти ёки шахсни тасдиқловчи бошқа ҳужжатлари бўлмаган.

Мамлакатимизнинг Деҳлидаги элчихонаси ушбу масалага ойдинлик киритиш мақсадида тезкор чора-тадбирлар кўрмоқда. Шу мақсадда Ҳиндистоннинг тегишли маҳкама ва идоралари билан алоқа ўрнатилиб, мазкур вазият назоратга олган.

Дипломатик миссия ватандошларимизни Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақирди.