Истанбулда кетма-кет бешта зилзила. Зеленский ҳудудларни беришдан бош тортиши ортидан Лондон музокаралари бузилди. ҲАМАСда янги тинчлик режаси. АҚШда гиёҳвандликка қарши грантлар бекор қилинди

🔹 Истанбулда бир соат ичида 3,9 баллдан 6,2 баллгача кетма-кет бешта зилзила содир бўлди, 200 нафарга яқин киши жароҳатланган. Бутун 15 миллионлик Истанбул кўчага чиққан. Туркия президенти Ражаб Тоййиб Эрдўғон хавотир билдириб, расмийлар вазиятни диққат билан кузатаётганини таъкидлади.  Шаҳар губернатори зилзиладан кейин электр тармоқлари ва сув қувурларида муаммо юзага келмагани, қулашлар рўй бермаганини айтди.

🔹 ҲАМАС Қоҳирада бўлажак музокаралар чоғида Ғазода ўт очишни тўхтатишнинг янги таклиф режасини тақдим этмоқчи. Таклиф фаластинлик маҳбусларнинг келишилган сони эвазига бир босқичда қолган барча исроиллик гаровга олинганларни озод қилиш, шунингдек, Исроил мудофаа кучларини Ғазо секторидан олиб чиқиш, барча жанговар ҳаракатларни тўхтатиш ва гуманитар ёрдамнинг тўсиқсиз кириб келишидан иборат.

🔹 Киев ўз ҳудудининг бир қисмини Россияга бериш масаласини муҳокама қилишдан бош тортгани ҳақида The Washington Post хабар берди. Сўнг Буюк Британия ҳукумати ташқи ишлар вазирлари даражасида Украина бўйича Лондон музокаралари номаълум муддатга қолдирилганини маълум қилди. Бугун Британия пойтахтида АҚШ, Буюк Британия, Украина, Франция ва Германия ТИВлари учрашуви ўтиши керак эди, бироқ Россия-Украина можаросини «тартибга солиш» қуйи даражадаги расмийларга қолди. Кеча Украина президенти Зеленский Қримни Россияники деб тан олишдан бош тортгач, АҚШ Давлат котиби Марко Рубио Лондонга сафарини бекор қилган.

🔹 Қирғизистоннинг Ўш шаҳридаги «Русский дом» корхонаси ходими Наталья Секерина ва яна икки киши қўлга олинган. Улар Украинадаги ҳарбий амалиётларда қатнашиш учун одам ёллашда гумон қилинмоқда. Қирғизистон Жиноят кодексида ушбу жинояти учун 15 йилгача қамоқ жазоси назарда тутилган.

🔹 АҚШ ўтган ҳафта Парижда Америка тақдим этган тинчлик таклифига яқин ўртада Украинадан расмий жавоб кутмоқда. Ҳужжат мазмуни билан танишларнинг айтишича, бу битим Трампнинг “якуний таклифи”. Ҳужжат бор-йўғи бир варақдан иборат, лекин Киев учун ўта нозик шартларни – Қримнинг Россиянинг бир қисми сифатида тан олиниши ва 2022 йил февралидан буён босиб олинган деярли барча ҳудудларнинг ишғол қилинганини амалда тан олиши каби шартларни ўз ичига олади.

🔹 Росгвардия генерали Михаил Варентсов ўта йирик миқдордаги фирибгарликда айбланиб, Москвада ҳибсга олинган.

🔹 АҚШ Адлия вазирлиги жамоат ташкилотлари ва маҳаллий ҳукуматларга берилган юзлаб грантларни бекор қилди. Бекор қилиниш ўқотар қуроллардан фойдаланиш билан зўравонликнинг олдини олиш, жиноят қурбонларига ёрдам бериш ва гиёҳвандликка қарши курашиш дастурларига таъсир кўрсатди.

🔹 Tesla биринчи чоракда 71 фоиз соф фойдасини йўқотган. Компанияга Трамп жорий қилган тарифлар ҳам зарар етказган. Қолаверса, Хитойда бугун очилган халқаро 21-Шанхай автомобиль саноати кўргазмасига Tesla учинчи бор қатнашмаяпти.

Г.Холдорова тайёрлади.