Украина ва АҚШ делегацияси Парижда. Исроил Трамп туфайли Эронга зарба беришдан бош тортди
🔹 Украина делегацияси АҚШ билан музокаралар учун Парижга келди. Делегация аъзоси, президент девони раҳбари Андрей Ермак сўзларига кўра, ташриф доирасида “талабгорлар коалицияси” ва хавфсизликни кафолатлашга қодир давлатлар, хусусан, Франция, Германия ва Буюк Британия вакиллари билан кўп томонлама учрашувлар ўтказиш режалаштирилган.
🔹 Исроил жорий йилнинг май ойида Эрон ядровий иншоотларига зарба беришни режалаштирди, бироқ Трамп бундай ҳаракатни қўллаб-қувватламагани учун ушбу амалга ошмаган. Тель-Авив шу йўсинда Теҳроннинг ядровий қурол яратиш саъй-ҳаракатларини бир йилга фалаж қилишга умид қилган. Эслатиб ўтамиз, 12 апрелда Уммон пойтахтида ўтган Эрон ва АҚШ делегациялари билвосита музокаралари Трамп томонидан ижобий деб баҳоланди. Икки кундан кейин музокараларнинг иккинчи раунди бошланади.
🔹 Ғазо секторидаги жанглар тўхташи учун ҲАМАС ҳаракати барча гаровга олинганларни озод қилиши керак. Бу ҳақда АҚШ президентининг гаровдагилар масалалари бўйича вакили маълум қилди.
🔹 Калифорния штати судга Трамп томонидан киритилган янги импорт тарифларига қарши даъво аризаси билан мурожаат қилди. Давлат ҳукумати уни мансаб ваколатини суиистеъмол қилганлик, минтақа ва бутун мамлакат иқтисодиётига зарар етказганликда айбламоқда.
🔹 Туркия мамлакат тарихидаги энг йирик наркотикларга қарши операция ўтказди. Пойтахтда 525 киши қўлга олинган.
🔹 Трамп маъмурияти Гарвард университетининг халқаро талабаларни қабул қилиш ҳуқуқидан маҳрум қилиш билан таҳдид қилмоқда. Университетда “ноқонуний визалар”да ўқиётган талабаларнинг “батафсил қайдлари”ни тақдим этиш талаб қилинмоқда. Акс ҳолда, Гарвард чет эллик талабаларни қабул қилиш ҳуқуқидан маҳрум бўлади.
🔹 Қирғизистонларнинг Москва ҳаммомида ушланиб қаттиқ дўппослангани Россия ТИВ томонидан тушунтирилди. Бунда асосан ноқонуний миграция ва ҳатто радикал гуруҳга алоқадорликка урғу берилган. Воқеа муносабати билан Қирғизистон Россияга ультиматум қўйган эди.
🔹 АҚШда олтин нархи ўсишда давом этиб, янги рекорд ўрнатди. Нархларнинг ошишига АҚШ Федерал захира тизими раиси Жером Пауеллнинг савдо урушининг мумкин бўлган оқибатлари ҳақида огоҳлантириши сабаб бўлгани айтилмоқда. Қайд этишилича, глобал иқтисодий беқарорлик шароитида инвесторлар олтинни ишончли ҳимоя активи сифатида кўриб, қимматбаҳо металларга фаол сармоя киритишда давом этмоқда.
Гулнора Холдорова тайёрлади.
