Ўтмишдан сабоқ, бугундан ифтихор: Каттақўрғон ҳақида янги китоб

Каттақўрғоннинг бой тарихи, бугунги қиёфаси ва эртанги орзу-мақсадлари жамланган янги китоб нашрдан чиқди. «Каттақўрғон: кечаги излар, бугунги манзиллар» номли мазкур асар шаҳар тарихига бағишланган ўзига хос маънавий хазинадир.

Шаҳар ҳокими Гавҳар Алимова ғояси асосида, Жамшид Носиров масъул муҳаррирлигида тайёрланган китоб тақдимоти кенг жамоатчилик иштирокида ўтказилди.

Тадбирда китобнинг яратилиш тарихи, уни тайёрлаш жараёнида тарихчи олимлар ва ижодий жамоанинг меҳнати ҳақида сўз юритилди. Намойиш этилган видеолавҳа эса иштирокчиларни Каттақўрғоннинг кечаги ва бугунги манзаралари билан таништирди. Китобда шаҳарнинг шонли тарихи билан бир қаторда, илм-фан, саноат, маданият ва спорт соҳаларидаги ютуқлар, замонавий бунёдкорлик жараёнлари ҳам акс этган.

Тақдимотда сўзга чиққанлар ушбу асар Каттақўрғон тарихини ўрганиш, унинг бой меросини асраш ва келажак авлодга етказишда муҳим манба бўлиб хизмат қилишини таъкидладилар.
«Каттақўрғон: кечаги излар, бугунги манзиллар» – кечани англаб, бугунни қадрлаш ва эртанги кунга ишонч билан қадам қўйишга чорловчи китоб.

Ҳилола ЭРГАШЕВА.