Жомбойлик аёлларга касаба уюшмалари совға улашди
Хотин-қизларнинг муаммоларини ўрганиш ва ҳал этиш, уларни моддий ва маънавий қўллаб-қувватлашга қаратилган чора-тадбирларни амалга ошириш бўйича Республика касаба уюшмалари федерацияси мутасаддилигида тузилган Ишчи гуруҳи март ойида Самарқанд вилоятида ўрганиш ишларини олиб борган эди.
Ишчи гуруҳ маҳаллаларда бўлиб, оғир турмуш шароитида яшаётган хотин-қизлар билан учрашиб, уларнинг дардларини, таклиф ва истакларини эшитган ҳамда шу асосида тегишли дастурлар ишлаб чиқилганди.
Биргина Жомбой туманидаги 236 та хонадондаги муаммоларни ҳал этиш бўйича белиланган чора-тадбирлар дастури бугун амалга оширилмоқда.
Вилоят касаба уюшмалари ташкилотлари бирлашмаси кенгаши раиси С.Рафиқов, Жомбой туманидан халқ депутатлари вилоят Кенгаши депутатлигига сайланган Ў.Саидмуродов ва Ҳ.Ўроқов оилавий тадбиркорлик билан шуғулланиб, оиласи учун даромад топиш истагини билдирган 6 нафар хотин-қизга тикув машиналарини топширди. Шунингдек, тумандаги кам таъминланган, эҳтиёжманд аёлларнинг 13 нафарига кир ювиш машинаси, 9 нафарига газ плитаси ва газ баллон, 3 нафарига газ плита, 4 нафарига телевизор, 1 нафарига музлатгичлар берилди.
А.АБДУСАИДОВ.
