Самарқанд туманида машиналардан салкам 4,5 миллион сўмлик жиҳоз ўғирлаган шахс жазоланди

Муҳриддин М. аввал ҳам судланган. Унга тузалиш йўлига кириш учун имконият берилган. Аммо у ўз “йўли”ни танлаб бўлган эди.

Муҳриддин 2019 йил 8 декабрь куни унаштирилган қизи билан учрашмоқчи бўлиб унга қўнғироқ қилди. Аммо у телефонини кўтармади. Шундан сўнг тоғасининг “Жигули” автомашинасида унинг яшаш жойига бориш учун йўлга тушди. Йўл-йўлакай ароқ ичди. Қизнинг уйи олдига бориб унга қўнғироқ қилди, жавоб бўлмади. Ноилож, ортга қайтди.

Қайтишида Самарқанд тумани Найман қишлоғи оралаб юрди. Маҳалла ички кўчасида, йўл четида “Дамас” автомашинаси турганини кўрди. Муҳриддинни шум ният чулғаб олди. Ярим тун, атрофда эса ҳеч ким йўқ эди...

Машинасини йўл четига қўйиб “Дамас”нинг қулфини бузишга уринди, очилавермагач, унинг ён ойналарини синдириб салондан магнитофон, машина таъмирлаш калитларини олди. Озгина юргандан сўнг шу кўчада яна бир “Жигули” йўл четида турганини кўриб тўхтади. Машинадан магнитофон, колонкаларини суғуриб олди. Кейин сал наридаги автобус кабинасидан тахминан 1,5 метрли қора рангли газ шланкасини, колонка ва магнитофонларни олди. “ВА3-21011” русумли автомашина салонидан ҳам шу каби асбоб-анжомларни ўмариб, барчасини машинасига ортиб уйига қайтди.

Эртасига Найман қишлоғидаги ушбу кўчада яшовчи қўни-қўшниларнинг тинчи бузилди. Барчасининг машинаси қулфи бузилгани, салондаги жиҳозлар ўғирланганидан ташвишга тушиб қолишди. Яхшиям айрим яшаш уйларида кузатув видеокамералари қўйилган экан. Видеоёзувлардан барчаси ойдинлашди: 8 декабрдан 9 декабрга ўтар кечаси  нотаниш “Ваз 2106” русумли автомашина ушбу кўчадан ўтиб кетгани, бир оз вақт ўтиб яна қайтиб ўтгани, қайтаётганида ёритиш чироқларини ўчириб ўтгани, маълум бўлди.

Ҳуқуқни муҳофаза қилувчи идора ходимлари Муҳриддин М.нинг жами 4 миллион 445 минг сўмлик мол-мулкларни талон-торож қилганини аниқлади. Барча мол-мулклар ўз эгаларига қайтарилди. Муҳриддин М.га жиноят кодексининг тегишли моддалари билан жазо тайинланди.

Д.НУРАЛИЕВ,

жиноят ишлари бўйича Самарқанд тумани суди судьяси.