Муаллим
Отадек заҳматкаш, отадек буюк,
Онадек меҳрибон, онадек суюк.
Ким бор ундан ортиқ хурматга лойиқ,
Дунёда тенги йўқ табаррук инсон -
Устоз муаллимдир, устоз - муаллим.
Қалбин қўри билан кўзимиз очган,
Йўлимизга умид уруғин сочган,
Қайноқ қучоғида мингларни қучган,
Номи дилдан кўчмас, тилларда достон,
Устоз муаллимдир, устоз - муаллим.
Субҳидам тонгидек юраги тоза,
Зам-зам булоғидек тилаги тоза,
Томирда қони соф, суяги тоза,
Кўклам булутидан олган андаза,
Қуш каби безавол, лек кўкси осмон,
Устоз муаллимдир, устоз - муаллим.
Қанча буюкларга муқаддас бешик,
Саодат уйига элтувчи эшик.
Сен ўша, дилларга жо бўлган қўшиқ,
Заковат зиёси ёритган бўстон,
Устоз муаллимдир, устоз - муаллим.
Ҳазрат Навоийни қўлидан тутган,
Улуғбек нигоҳин юлдузга отган,
Не-не алломалар пойида ётган,
Маърифат томига қўйилган нарвон -
Устоз муаллимдир, устоз - муаллим.
Гўдакни ардоқлаб, Нақшбанд этган,
Қанча Бухорийни элга танитган,
Бизларга аждодлар саломин битган,
Энг катта бойлиги - покиза иймон,
Устоз муаллимдир, устоз - муаллим.
Шогирдлари эрур топган давлати,
Ютуғидан ортар белда қуввати,
Ҳаммага баробар, баланд ҳиммати,
Саховат мулкига камтарин султон,
Устоз муаллимдир, устоз - муаллим.
Ўттизга бўлади битта жонини,
Бесамар ўтказмас бирор онини,
Ҳалолдан топади бурда нонини,
Миллат ардоқлаган ўша шараф-шон,
Устоз муаллимдир, устоз - муаллим.
Эртадан умидвор, бугундан рози,
Қўлидан тушмайди нафосат сози,
Оламни титратар ўткир овози,
Истиқлолга юзин очган гулистон -
Устоз муаллимдир, устоз - муаллим.
Қўлидан тушмайди дафтар, қалами,
Тилидан тушмайди ҳикмат каломи,
Каттаю кичикка бирдек саломи,
Ҳаёт карвонига беназир сарбон,
Устоз муаллимдир, устоз - муаллим.
Ҳар сўзи жавоҳир - муқаддас китоб,
Урфон осмонида чақнаган офтоб,
Туриш турмушининг ўзи бир савоб,
Хурофат йўлига қўйилган қалқон -
Устоз муаллимдир, устоз – муаллим!
Комил СИНДОРОВ.
