Оқдарёга автобус қатнови қўйиладими?

Самарқанд шаҳрига электробуслар олиб келингач, айрим йўналишлардаги «Исузу» автобусларини туманларга йўналтириш режалаштирилган эди. Шаҳар йўналишлари учун электробуслар келгани ҳақида ўқияпмиз. Хўш, энди туманларда, жумладан, Оқдарёда автобус қатнови йўлга қўйиладими?

Д.Ўтамуродов.
Оқдарё тумани.

Самарқанд шаҳар жамоат транспортининг Бош режасига асосан, барча йўналишларни қамраб олиш учун 452 та жамоат транспорти керак бўлади. Ҳозирда янги автобус ва электробуслар сони 228 тага етказилди. Шу пайтгача ишлаб келган “Исузу” русумли автобуслар билан биргаликда 350 та транспорт воситалари йўловчиларга хизмат қилмоқда.

Шаҳар жамоат транспорти йўналишлари тўлиқ янги ўрта ва катта сиғимли автобуслар билан таъминлансагина, “Исузу” русумли автобуслар тадбиркорларга шаҳар атрофи йўналишларида фаолият юритиши юзасидан таклифлар берилади ва очиқ тендерлар асосида жойлаштирилади.

Самарқанд вилоят транспорт бошқармаси.