Навқирон шаҳрим – Самарқанд дунё нигоҳида
Ўзбекистоннинг қадимий ва бебаҳо шаҳарларидан бири бу Самарқанддир. Дунё тарихида муҳим ўрин эгаллаган, не-не буюк саркардалар ва олимлар етишиб чиққан бу маскан бугун ҳам ўзининг жозибаси, бой тарихи ва замонавий қиёфаси билан халқаро эътиборни тортмоқда. Самарқанд – бу нафақат тарихий обида, балки бугунги кунда навқирон, ривожланаётган, жаҳон нигоҳида порлаб бораётган шаҳардир.
Самарқанд қадимда Мовароуннаҳр деб аталган ҳудуднинг юраги ҳисобланган. Бу ерда қадимий Афросиёб шаҳри, Регистон мажмуаси, Улуғбек расадхонаси, Шоҳи Зинда мажмуаси, Бибихоним масжиди каби дунё эътироф этган обидалар жойлашган. Бу обидалар нафақат маҳаллий, балки хорижий сайёҳларнинг ҳам эътиборини тортиб келмоқда.
2019 йилда Самарқанд ЮНЕСКОнинг Бутунжаҳон мероси рўйхатига киритилгани – шаҳар тарихий аҳамиятининг яна бир исботи бўлди. Айниқса, Регистон майдонидаги мадраса ва меъморий безаклар нафақат ўзбек меъморчилиги, балки бутун ислом дунёсининг фахридир.
Бугунги Самарқанд — бу замонавий инфратузилма, обод йўллар, халқаро аэропорт, университетлар ва конгресс марказлари билан ажралиб туради. Хусусан, 2022 йилда ўтказилган ШҲТ саммити муносабати билан шаҳар янада чиройли қиёфа касб этди. Янги “Silk Road” халқаро туризм маркази, Конгресс холл, замонавий меҳмонхоналар ва хиёбонлар шаҳарнинг янги босқичга чиққанидан далолат беради.
Буларнинг барчаси Самарқандни халқаро миқёсда танитмоқда. Ҳар йили минглаб сайёҳлар бу шаҳарга ташриф буюриб, ўз таассуротларини ижтимоий тармоқларда баҳам кўришади. Шу тариқа, Самарқанд бутун дунё нигоҳида – ўз тарихий заминида барпо этилган келажак шаҳрига айланмоқда.
Буюк алломалар Имом Бухорий, Мирзо Улуғбек, Беруний, Ибн Сино каби олимлар ҳаёти ва фаолияти Самарқанд билан боғлиқ. Бугунги кунда ҳам бу анъана давом этмоқда. Самарқандда халқаро даражадаги университетлар очилмоқда.
Бундан ташқари, шаҳар кўплаб маданий фестиваллар, илмий анжуманлар ва санъат кўргазмаларига мезбонлик қилмоқда. Бу эса Самарқанднинг нафақат тарихий, балки илмий-маърифий ва маданий пойтахти сифатидаги нуфузини оширмоқда.
Самарқанд бугун ўтмишни ифтихор билан сақлаган, аммо келажакка қатъий қараб бораётган навқирон шаҳардир. Унинг обод кўчалари, нурли бинолари, тарихий обидалари ва маърифатли ёшлари билан Самарқанд бугун дунё нигоҳида муносиб ўрин эгаллаб бормоқда.
Бундай шаҳарни севмаслик, унга ғурур билан қарамаслик мумкин эмас. Ҳар бир самарқандлик учун бу шаҳар она юртдан ҳам зиёд қадрли. Зеро, Самарқанд бу ўзлигимиз, тарихимиз ва порлоқ келажагимизнинг тимсолидир.
Азиз ЛАТИПОВ,
Самарқанд давлат чет
тиллари институти ўқитувчиси.
