Самарқандлик ижодкорлар кўкрак нишони ва хизмат кўрсатган санъат арбоби унвони билан тақдирланди
ЮНЕСКОнинг 43-сессияси доирасида вилоят мусиқали драма театрида маданият ва санъат соҳаси вакилларини тақдирлаш маросими бўлиб ўтди.
Тантанали тадбирда юртимиз маданияти ва санъати равнақи йўлида кўп йиллар давомида самарали меҳнат қилиб келаётган бир гуруҳ ижодкорлар унвон ва кўкрак нишони билан тақдирланди.
Маросимда сўз олганлар таъкидлашича, бундай эътирофлар нафақат ижодкорлар фаолиятига берилган юксак баҳо, балки уларнинг ёш авлод учун ибрат бўладиган меҳнатсеварлиги ва ватанпарварлик туйғусининг амалий ифодасидир.
ЮНЕСКОнинг фан, таълим ва маданият масалалари қўмитаси қарорига биноан бир қатор соҳа намояндаларига «Хизмат кўрсатган санъат арбоби» унвони берилди. Шунингдек, Ўзбекистон Республикаси маданият вазирининг тегишли буйруғига асосан бир гуруҳ фидойи ижодкорлар «Маданият ва санъат фидокори» кўкрак нишони билан тақдирланди.
Мукофотларни Ўзбекистон маданият вазирининг биринчи ўринбосари Баҳодир Аҳмедов тантанали равишда топширди. У маданият ва санъат соҳасидаги бундай эътирофлар ижодкорларни янги ғоя ва лойиҳалар сари илҳомлантиришини таъкидлади.
Маросимда Ўзбекистонда хизмат кўрсатган артист Эркин Қайтаров ҳам ЮНЕСКО томонидан «Хизмат кўрсатган санъат арбоби» унвони билан тақдирланди.
- Бу мукофот мен учун катта шараф ва бир вақтнинг ўзида масъулият ҳамдир, - деди Эркин Қайтаров. - ЮНЕСКО каби нуфузли ташкилот томонидан меҳнатимнинг эътироф этилиши мени янада янги ижодий изланишлар, халқимиз маданий ҳаётини бойитиш йўлида фидокорона меҳнат қилишга руҳлантиради.
