Жаҳон чемпионати Самарқандда юксак савияда ўтказилди
Хабар берганимиздек, Самарқанддаги “Silk Road Samarkand” халқаро туристик марказида бильярд спорт турининг динамик пирамида йўналиши бўйича жаҳон чемпионати ўтказилди.
Халқаро пирамидалар конфедерацияси ҳамда Ўзбекистон бильярд спорти федерацияси шафелигида мамлакатимизда илк бор ташкил этилган чемпионатда Ўзбекистон, Россия, Қозоғистон, Қирғизистон, Тожикистон, Туркманистон, Озарбайжон, Молдова ҳамда Беларусь мамлакатларидан 100 нафардан ортиқ спортчи иштирок этди.
Қарийб бир ҳафта давомида мухлислар энг кучли бильярдчиларнинг қизғин баҳсларига гувоҳ бўлди. Ҳар бир ўйин қизиқарли, кескин рақобат руҳида кечди ва энг кучлиларга омад кулиб боқди.
Кутилганидек, эркаклар мусобақасида жаҳоннинг энг кучли спортчиларидан саналган россиялик Иосиф Абрамов биринчи ўринни қўлга киритди. Россия жамоасининг яна бир аъзоси Никита Володин ва қирғизистонлик Арсен Калыбек ўғли иккинчи ўринни эгаллади. Мамлакатимиз вакили Нурбек Саломов учинчи ўрин билан кифояланди.
– Ўзбекистонда бильярд ишқибозлари жуда кўплигига ушбу чемпионат давомида яна бир бор амин бўлдим, – дейди жаҳон чемпионати кумуш медали соҳиби, россиялик Никита Володин. – Шу билан бирга бу спорт тури билан шуғулланадиган профессионал ва ҳаваскор бильярдчилар ҳам кўп экан. Бу эса мамлакатда бильярдни кенг оммалаштириш ва ривожлантиришга хизмат қилади. Ўзбекистон, Самарқанд мезбонлигида ўтган чемпионат юқори савияда ташкил этилди ва биз бу ердаги мусобақадан жуда катта таассурот, завқ олдик.
Учинчи ўрин ва бронза медалини қўлга киритган ҳамюртимиз Нурбек Саломов Самарқандда ўтказилган жаҳон чемпионати у учун катта тажриба мактаби бўлганини қайд этиб, кучли бильярдчилар билан кечган ўйинлар унинг маҳоратини оширишга хизмат қилганини таъкидлади.
Аёллар мусобақаси ҳам шиддатли курашларга бой бўлди ва қизиқарли баҳслар якунида Беларусь республикасидан келган Екатерина Перепечаева-Чернухо биринчи ўринни эгаллади. Иккинчи ва иккита учинчи ўрин россиялик бильярдчилар Екатерина Брытченко, Диана Миронова ҳамда Кристина Салтовскаяга насиб этди.
Жаҳон чемпионати бош котиби Сергей Карапетов Самарқандда ўтган чемпионатга юқори савияда тайёргарлик кўрилгани ва ўйинлар юксак даражада ўтганини қайд этиб, бунинг учун Ўзбекистон бильярд федерацияси ва бошқа ташкилотчиларга миннатдорлик билдирди.
– Ўзбекистон биринчи марта жаҳон чемпионатига мезбонлик қилди, лекин ташкилотчилик даражаси ҳақиқатда ажойиб. Улар жуда катта ҳажмдаги ишни бажарди ва натижада А даражасидаги ажойиб ўйинларга гувоҳ бўлдик, – деди Сергей Карапетов.
Чемпионат ташкилотчиларидан бири, IRBIS-S бильярд клуби раҳбари, “Старт” фабрикасининг Самарқанддаги расмий вакили Сайфулла Тўрақулов Ўзбекистон биринчи марта жаҳон бильярд усталарининг бундай юлдузли таркибини қабул қилиб, нуфузли чемпионатга мезбонлик қилганидан фахрланишини қайд этди.
– Биз Самарқандда кейинги пайтда тез-тез республика ва халқаро даражада мусобақалар уюштиряпмиз, лекин жаҳон чемпионатининг нуфузи, аҳамияти бошқача, – дейди Сайфулла Тўрақулов. – Бу спортчиларимизнинг маҳоратини ошириш ва жаҳоннинг кучли бильярдчиларидан тажриба ўрганишлари учун яхши имконият бўлди. “Старт” фабрикаси чемпионат учун энг қулай ва юқори сифатли жиҳозларни етказиб берди. Бу ҳам чемпионат юқори савияда ўтишига хизмат қилди.
Чемпионат ғолибларини тақдирлаш маросимида Ўзбекистон бильярд федерацияси раҳбари Ўткир Комилов ғолиблар ва барча иштирокчиларни табриклаб, мамлакатимиз бундан кейин ҳам бу каби нуфузли мусобақаларни ўтказишга тайёрлигини билдирди.
