Navqiron shahrim – Samarqand dunyo nigohida
O‘zbekistonning qadimiy va bebaho shaharlaridan biri bu Samarqanddir. Dunyo tarixida muhim o‘rin egallagan, ne-ne buyuk sarkardalar va olimlar yetishib chiqqan bu maskan bugun ham o‘zining jozibasi, boy tarixi va zamonaviy qiyofasi bilan xalqaro e’tiborni tortmoqda. Samarqand – bu nafaqat tarixiy obida, balki bugungi kunda navqiron, rivojlanayotgan, jahon nigohida porlab borayotgan shahardir.
Samarqand qadimda Movarounnahr deb atalgan hududning yuragi hisoblangan. Bu yerda qadimiy Afrosiyob shahri, Registon majmuasi, Ulug‘bek rasadxonasi, Shohi Zinda majmuasi, Bibixonim masjidi kabi dunyo e’tirof etgan obidalar joylashgan. Bu obidalar nafaqat mahalliy, balki xorijiy sayyohlarning ham e’tiborini tortib kelmoqda.
2019 yilda Samarqand YuNESKOning Butunjahon merosi ro‘yxatiga kiritilgani – shahar tarixiy ahamiyatining yana bir isboti bo‘ldi. Ayniqsa, Registon maydonidagi madrasa va me’moriy bezaklar nafaqat o‘zbek me’morchiligi, balki butun islom dunyosining faxridir.
Bugungi Samarqand — bu zamonaviy infratuzilma, obod yo‘llar, xalqaro aeroport, universitetlar va kongress markazlari bilan ajralib turadi. Xususan, 2022 yilda o‘tkazilgan ShHT sammiti munosabati bilan shahar yanada chiroyli qiyofa kasb etdi. Yangi “Silk Road” xalqaro turizm markazi, Kongress xoll, zamonaviy mehmonxonalar va xiyobonlar shaharning yangi bosqichga chiqqanidan dalolat beradi.
Bularning barchasi Samarqandni xalqaro miqyosda tanitmoqda. Har yili minglab sayyohlar bu shaharga tashrif buyurib, o‘z taassurotlarini ijtimoiy tarmoqlarda baham ko‘rishadi. Shu tariqa, Samarqand butun dunyo nigohida – o‘z tarixiy zaminida barpo etilgan kelajak shahriga aylanmoqda.
Buyuk allomalar Imom Buxoriy, Mirzo Ulug‘bek, Beruniy, Ibn Sino kabi olimlar hayoti va faoliyati Samarqand bilan bog‘liq. Bugungi kunda ham bu an’ana davom etmoqda. Samarqandda xalqaro darajadagi universitetlar ochilmoqda.
Bundan tashqari, shahar ko‘plab madaniy festivallar, ilmiy anjumanlar va san’at ko‘rgazmalariga mezbonlik qilmoqda. Bu esa Samarqandning nafaqat tarixiy, balki ilmiy-ma’rifiy va madaniy poytaxti sifatidagi nufuzini oshirmoqda.
Samarqand bugun o‘tmishni iftixor bilan saqlagan, ammo kelajakka qat’iy qarab borayotgan navqiron shahardir. Uning obod ko‘chalari, nurli binolari, tarixiy obidalari va ma’rifatli yoshlari bilan Samarqand bugun dunyo nigohida munosib o‘rin egallab bormoqda.
Bunday shaharni sevmaslik, unga g‘urur bilan qaramaslik mumkin emas. Har bir samarqandlik uchun bu shahar ona yurtdan ham ziyod qadrli. Zero, Samarqand bu o‘zligimiz, tariximiz va porloq kelajagimizning timsolidir.
Aziz LATIPOV,
Samarqand davlat chet
tillari instituti o‘qituvchisi.
