Нурободда болаларни дам олдириш ва соғломлаштириш бўйича мавсум бошланди

Жорий йилда туман бўйича 4 та стационар турдаги оромгоҳ ва соғломлаштириш майдончалари фаолияти йўлга қўйилиб, уларда жами 820 нафардан ортиқ болани дам олдириш режалаштирилган.

Жумладан, 1 та стационар турдаги оромгоҳда 320 дан ортиқ, 3 та соғломлаштириш майдончаларида 500 га яқин бола соғломлаштирилади.

Мавсум давомида оромгоҳ ва соғломлаштириш майдончаларида болалар учун интеллектуал ривожлантириш, экологик-биологик ва ўлкашунослик, техник ижодкорлик, ижтимоий мослашув, тарбия ва спорт-соғломлаштириш, бадиий ижодиёт йўналишларига ихтисослаштирилган тўгараклар ташкил этилиши режалаштирилган.

Болалар саломатлиги доимий равишда малакали шифокор ва ҳамширалар назоратида бўлиб, масканлардаги тиббиёт хоналари барча зарур тиббий асбоб-ускуналар ва жиҳозлар, дори-дармонлар, махсус дори воситалари билан таъминланган.