Олти ойи давомида 3,7 миллиард сўмлик ноқонуний заргарлик буюмлари айланмасининг олди олинди
Самарқанд вилояти божхона бошқармаси томонидан заргарлик буюмларининг ноқонуний айланмасига қарши кескин чоралар кўрилмоқда.
Таҳлилларга кўра, сўнгги йилларда аниқланаётган ҳуқуқбузарликлар сони ортиб бормоқда. Жорий йилнинг ўтган 6 ойи давомида 64 та ҳолат фош этилиб, 3,7 миллиард сўмлик, умумий оғирлиги 5 килограмм 410 грамм бўлган 133 номдаги заргарлик буюмлари ашёвий далил сифатида олинди.
Ўтган йилнинг шу даврига нисбатан аниқланган ҳолатлар сони, буюмларнинг қиймати ва оғирлиги сезиларли даражада ошган. Хусусан, мусодара қилинган заргарлик буюмларининг оғирлиги 2 килограмм 208 граммга кўпайган.
Мазкур натижалар божхона органларининг мамлакат иқтисодий манфаатларини ҳимоя қилиш ҳамда контрабанда ва божхона қонунчилиги бузилишларига қарши кураш борасидаги ишлар изчил давом этаётганини яна бир бор тасдиқлайди.
