Перинатал марказда янги ускуна яна бир ногиронликнинг олдини олади
Вилоят перинатал марказига қиймати 1 миллиард 500 миллион сўм бўлган тиббий ускуна - педиатрик неонатал ретинал камера топширилди.
Ўзбекистон “Меҳр-шафқат ва саломатлик” жамоат фонди давлат ижтимоий буюртмаси шаклидаги "Эрта туғилган чақалоқларни ретинополиядан ҳимоя қилиш" лойиҳаси доирасида амалга оширилган мазкур жараён болаларда кўз касалликлари билан боғлиқ ногиронликнинг олдини олишга хизмат қилади.
Замонавий ускуналар Олий Мажлис ҳузуридаги Фуқаролик жамияти институтларини қўллаб-қувватлаш Жамоат фонди вилоят бўлими, “Меҳр-шафқат ва саломатлик” жамоат фонди вакиллари томонидан вилоят перинатал марказига топширилди.
- Ушбу тиббий ускуна эрта туғилган чақалоқларда учрайдиган ретинопатия, яъни кўз тўр касалликларининг олдини олишда жуда муҳим, - дейди вилоят перинатал маркази бош шифокори Лола Ҳамроева. - Чала туғилган болалар ретинопатияси – бу кўз тўр парданинг вазопролифератив шикастланиши бўлиб, фақатгина муддатидан эрта туғилган болаларда учрайдиган касаллик ҳисобланади. Касаллик натижасида кўз тўр пардаси, шишасимон тана ва баъзан гавҳарда ўзгаришлар кузатилади. Ўз вақтида даволанмаса, кўз ичида чандиқлар ривожланиши ва тўр парда кўчиши сабабли кўрликка олиб келади. Асосан тана вазни 2000 - 1500 граммдан кам, муддатидан эрта туғилган болаларда учрайди.
Ўтган йили чала туғилган 800 нафарга яқин чақалоқларни тиббий кўрикдан ўтказганимизда 90 нафарга яқинида кўз пардасининг шикастланиши хасталиги аниқланган. Шу пайтгача ушбу ташхис билан туғилган болаларни даволашда анча эски ускуна билан ишлашимизга тўғри келар, кўпчиликни пойтахтга жўнатишга мажбур бўлар эдик. Эндиликда ушбу замонавий жиҳоз ёрдамида касалликни эрта аниқлаш ва даволаш имконияти пайдо бўлди.
Таъкидлаш жоиз, Олий Мажлис ҳузуридаги Фуқаролик жамияти институтларини қўллаб-қувватлаш Жамоат фонди томонидан молиялаштирилган, қиймати 6,5 миллиард сўмни ташкил этадиган молиявий мазкур лойиҳа доирасида республика ҳамда Хоразм, Навоий, Самарқанд ва Фарғона вилоятларидаги перинатал марказларни педиатрик неонатал ретинал камера билан таъминлаш кўзда тутилган.
