Қатар "Тошкент — Самарқанд" йўналишида тезюрар поездлар учун темирйўл қуришни режалаштирмоқда

Туризм қўмитаси хабарига кўра, Қатарнинг Power International Holding компанияси раиси ўринбосари Морис Гаттас ҳамда Туризм қўмитаси раиси Умид Шодиев ўртасида учрашув бўлиб ўтган.

Томонлар Ўзбекистонда туризм инфратузилмасини ривожлантиришга қаратилган лойиҳаларни амалга ошириш ва уларга сармоя йўналтириш масалаларини кўриб чиққан. Таъкидланишича, Қатар компанияси Ўзбекистонда бир қатор лойиҳаларни амалга оширишга инвестиция киритади.

Компания "Тошкент - Самарқанд" йўналишида тезюрар поездлар учун темирйўл қурилишига маблағ ажратмоқчи. Бундан ташқари, шу йўналишда пулли автомобиль йўлини қуриш лойиҳаси ҳам бор.

Шунингдек, мамлакатнинг тарихий шаҳарларида меҳмонхоналар қуриш, Тошкент вилоятида халқаро умуммавсумий тематик боғ барпо этиш лойиҳаларини молиялаштириш масалалари муҳокама қилинган.